Roman Sklıar Bavarııa Úkimetiniń ókilderimen kezdesti

ASTANA. QazAqparat – Premer-Mınıstrdiń birinshi orynbasary Roman Sklıar men Bavarııanyń Ekonomıka, jerdi damytý jáne energetıka mınıstrliginiń stats-hatshysy Roland Vaıgerttiń kezdesýi barysynda Qazaqstan men Bavarııa (Germanııa Federatıvtik Respýblıkasy) yntymaqtastyǵynyń perspektıvalary talqylandy, dep habarlaıdy QazAqparat Úkimettiń baspasóz qyzmetine silteme jasap.

Kezdesý barysynda qazaq-nemis saýda-ekonomıkalyq jáne ınvestıtsııalyq yntymaqtastyǵyn tereńdetý, «jasyl ekonomıkany» damytý, sondaı-aq birlesken jobalardy iske asyrý máseleleri qaraldy.

Bavarııa Úkimetiniń ókilderin qarsy alǵan Roman Sklıar Germanııa Qazaqstannyń Eýropalyq odaqtaǵy mańyzdy seriktesi ekenin atap ótti. QR Premer-Mınıstriniń birinshi orynbasary energetıka, ónerkásip, kólik-logıstıka salasy jáne t.b. sııaqty basym baǵyttar boıynsha áriptestikti odan ári tereńdetýge qyzyǵýshylyq bildirdi.

Bavarııa delegatsııasynyń basshysy Roland Vaıgert eki eldiń memlekettik organdary men bıznes-qurylymdary arasyndaǵy ózara is-qımyl deńgeıin joǵary baǵalady. Ol Nemis kompanııalarymen jumys jónindegi arnaıy jumys tobynyń tıimdiligin atap ótti. Sonymen qatar delegatsııa ókilderi nemis bıznesiniń ken oryndaryn ıgerýge qatysýyna, ekonomıkanyń energetıkalyq jáne kólik salalarynda yntymaqtastyqta bolýyna qyzyǵýshylyq tanytty.

Sońynda «suraq-jaýap» formatynda pikirtalas ótti, onyń barysynda qatysýshylar praktıkalyq máselelerdi iske asyrý barysyn talqylady.