Roman Sklıar avtojoldardaǵy jaǵdaı boıynsha birqatar tapsyrma berdi
NUR-SULTAN. QazAqparat - Roman Sklıar respýblıkalyq avtojoldardaǵy tótenshe jaǵdaı máseleleri boıynsha birqatar tapsyrmalar berdi, dep habarlaıdy primeminister.kz.
Búgin, 27 qańtarda Premer-Mınıstrdiń orynbasary Roman Sklıardyń tóraǵalyǵymen respýblıkanyń avtomobıl joldaryndaǵy tótenshe jaǵdaılar máselesi boıynsha selektorlyq keńes ótti.
Bul másele boıynsha ishki ister mınıstri Erlan Turǵymbaev, Indýstrııa jáne ınfraqurylymdyq damý vıtse-mınıstri Berik Kamalıev baıandama jasady, aımaqtardaǵy jaǵdaı týraly Aqmola, Qaraǵandy, Qostanaı, Pavlodar, Soltústik Qazaqstan oblystary men Nur-Sultan qalalary ákimderiniń orynbasarlary baıandady.
Búgingi kúni respýblıkanyń avtojoldarynda 750 adam qutqaryldy, onyń ishinde 139 bala; 47 adam evakýatsııalandy, onyń ishinde 11 bala, 1,5 myńnan astam tehnıka qar qursaýynan shyǵaryldy.
ІІM málimetinshe, respýblıka boıynsha avarııalyq-qutqarý jumystaryna 1644 adam men 1153 tehnıka jumyldyrylǵan.
Búgingi tańda respýblıkalyq mańyzy bar avtojoldarda 33 ýchaske jabyq bolyp qalatynyn aıtty. Avtojoldardyń jabyq ýchaskelerin tazalaý úshin qar tazalaıtyn 442 tehnıka jumyldyrylǵan.
Keńes qorytyndysy boıynsha Roman Sklıar osy máselege úzdiksiz monıtorıng júrgizýdi tapsyrdy. Bul rette, ákimdikterge qar qursaýynan týyndaǵan avtojoldardy paıdalanýshylarǵa tamaq berýdi uıymdastyrý arqyly ýaqytyly ornalastyrý mindeti qoıyldy; jylytý pýnktteri medıtsınalyq qyzmettermen, qajetti azyq-túlik ónimderimen jáne janar-jaǵarmaımen qamtamasyz etilýi tıis.
Budan basqa, ulttyq ekonomıka jáne ishki ister mınıstrlikterine zańnamada belgilengen tártippen memlekettik materıaldyq rezervti brondaý jáne qar tazalaý tehnıkasyn oblys ákimdikterine, Nur-Sultan jáne «QazAvtoJol» UK» AQ-na berýdi jedeldetý tapsyryldy.
