Roman Sklıar «Arselor Mıttal Temirtaýdy» Reseı kompanııasyna berýge qatysty túsinik berdi

ASTANA. QazAqparat – Premer-Mınıstrdiń birinshi orynbasary Roman Sklıar «Arseloar Mıttal Temirtaý» kompanııasynyń ornyna reseılik «Severstal» kompanııasynyń keletini týraly málimetke pikir bildirdi, dep habarlaıdy QazAqparat tilshisi.

«Olaı emes, Reseı kompanııalarynan eshkim kelissóz júrgizip jatqan joq. Taǵy da túsindirip aıtaıyn, eshqanda kelissóz júrip jatqan joq», - dedi birinshi vıtse-premer Aqordada tilshiler suraǵyna oraı.

Sondaı-aq Roman Sklıar ázirge ınvestor qaı elden keletinin aıtý erte ekenin atap ótti.

«Iá, shynymen de, kompanııa qondyrǵylardy jóndeý, ınvestıtsııalar boıynsha mindettemelerin keshiktirýde. Kásiporynda adam qazasymen baılanysty qaıǵyly oqıǵalar bolyp jatyr. Onyń bári bizdi alańdatpaı qoımaıdy. Sondyqtan óndiristi damytýǵa aqsha quıyp, tıimdi jumys isteı alatyn ózge ınvestorlardy tartý baǵytynda jumys júrgizilip jatyr. Onyń ishinde eńbek qaýipsizdigi – negizgi basym baǵyt. Qazir qaı eldiń ınvestorlary kelýi múmkin ekenin aıta almaımyn, erte bolady», - dedi birinshi vıtse-premer.