Roman Sklıar Almatydaǵy JEO-2 men JEO-3 nysandaryn jańǵyrtý barysymen tanysty
ASTANA. KAZINFORM - Qazaqstan Respýblıkasy Premer-mınıstriniń birinshi orynbasary Roman Sklıar Almatyǵa jasaǵan jumys sapary aıasynda qalanyń jylý elektr ortalyqtary — JEO-2 jáne JEO-3 nysandaryn aralady.
Energetıkalyq nysandardy sholý jumystaryna qala ákimi Darhan Satybaldy jáne salalyq uıymdardyń ókilderi qatysty.
Almatynyń Alataý aýdanynda JEO-2-ni tabıǵı gazǵa kóshirý arqyly jańǵyrtý jobasy júzege asyrylyp jatyr. Jobanyń merdigeri — Qytaı Halyq Respýblıkasynyń kompanııalarynan quralǵan konsortsıým.
Qurylys jumystary 2024 jyly bastaldy, 2026 jyly aıaqtaý josparlanǵan. Joba aıasynda jylý qýaty saǵatyna 952 Gkal-ǵa deıin, al elektr qýaty 600 MVt-qa deıin jetetin zamanaýı gaz stansasyn salý kózdelgen.
Jańǵyrtýdyń basty maqsaty — qalanyń energııamen qamtylý senimdiligin saqtaı otyryp, qorshaǵan ortaǵa taralatyn zııandy qaldyqtardyń kólemin azaıtý.
Qazirgi ýaqytta negizgi jáne qosalqy jabdyqtardy jetkizý jumystary 99%-ǵa oryndalǵan. Úsh gaz týrbınalyq qondyrǵy men generatorlar, sondaı-aq, tórt sý jylytý qazandyǵy ornatylǵan. Kádege jaratý qazandyǵyn montajdaý jumystary júrip jatyr. Qosalqy ınfraqurylym men jol qurylysy aıaqtalǵan. Negizgi nysandardaǵy qurylys-montaj jumystarynyń jalpy daıyndyq deńgeıi shamamen 55%.
Qazirgi kezde jumystar bas korpýs ǵımaratynda, sý jylytý qazandyqtarynda, sý daıyndaý júıelerinde, gaz daıyndaý pýnktinde, sondaı-aq elektr tehnıkalyq ınfraqurylym nysandarynda júrgizilip jatyr.
Almaty JEO-2 — qalanyń eń iri jylý kózi. Jańǵyrtý qorshaǵan ortaǵa túsetin júktemeni edáýir azaıtyp, ekologııalyq qaýipsizdik deńgeıin arttyryp, Almatyny turaqty jylý jáne elektr qýatymen qamtamasyz etýge jol ashady.
Tekserý qorytyndysy boıynsha Roman Sklıar jobany belgilengen merzimde júzege asyrýdy, qurylys-montaj jumystarynyń sapasyna jáne jabdyqtardyń ýaqytyly jetkizilýine baqylaýdy kúsheıtýdi, sondaı-aq nysandy bıyl paıdalanýǵa berý úshin qajetti sharalardy qabyldaýdy tapsyrdy.
Sapar barysynda Almaty oblysynyń Іle aýdanynda ornalasqan JEO-3 nysanyn qaıta jańǵyrtý jumystarynyń barysy da qaraldy. Atalǵan stansa 2007 jyldan beri «Almaty elektr stansalary» aktsıonerlik qoǵamynyń quramynda jumys istep keledi. Joba aıasynda qýaty keminde 450 MVt bolatyn bý-gaz qondyrǵysyn salý jáne tozyǵy jetken jabdyqtardy jańartý kózdelgen.
Jobanyń merdigeri — qazaqstandyq kompanııalar konsortsıýmy. Qazirgi ýaqytta ınjenerlik-izdestirý jáne jer jumystary tolyq aıaqtalyp, irgetas ornatý, sondaı-aq negizgi ınfraqurylym nysandaryn salý jumystary qolǵa alynǵan. Gaz týrbınalyq qondyrǵynyń alǵashqy jıyntyǵy irgetasqa ornatylǵan, jabdyqtardy montajdaý jáne energetıkalyq nysandar qurylysy jalǵasýda. JEO-3 boıynsha Premer-mınıstrdiń birinshi orynbasary qurylys-montaj jumystarynyń qarqynyn jedeldetý, jobaǵa qatysýshylardyń úılesimdi áreketin qamtamasyz etý jáne qurylys kezeńderiniń der kezinde ári sapaly aıaqtalýyn baqylaýǵa alý jóninde tapsyrmalar berdi.
Aıta keteıik, oysǵan deıin Premer-mınıstr Oljas Bektenov Almaty qalasyndaǵy ekinshi jáne úshinshi JEO qurylysynyń qarqyny tómendep ketkenin synǵa alǵan bolatyn.
