Roman Sklıar Aqtóbe oblysy Tamdy aýylynyń turǵyndarymen kezdesti
AQTÓBE. KAZINFORM – QR Premer-Mınıstriniń birinshi orynbasary Roman Sklıar Aqtóbe oblysyna jumys sapary barysynda Alǵa aýdany Tamdy aýylynda sý tasqynynan qalyptasqan jaǵdaıdy tekserdi. Onda 2 myńnan astam adam turady. Keshe Elek ózeninen kelgen sý dambydan asyp, aýylǵa kirgen, dep habarlaıdy Úkimettiń baspasóz qyzmeti.
Roman Sklıarǵa qutqarý jumystaryna 50-ge jýyq adam jumyldyrylyp, 80 tonna ınertti materıal daıyndalǵany jóninde baıandaldy. Qazir jaǵdaı qalypty. Aýlalaryna sý kirgen úılerge kómek kórsetildi.
Aýyl turǵyndary Roman Sklıarǵa keler jyly sý tasqynynyń aldyn alý úshin dambyǵa jóndeý jumystaryn júrgizip, Elek ózeniniń arnasyn tazartý kerektigin aıtyp, kómek surady.
«Sý tasqynyna baılanysty ahýal Premer-Mınıstrdiń jáne Úkimettiń turaqty baqylaýynda. Barlyq qajetti sharalar qabyldanady. Tabıǵı apattan zardap shekken azamattarǵa jan-jaqty kómek kórsetiledi», - dep atap ótti Roman Sklıar.
Elek ózeni boıyndaǵy Tamdydaǵy dambynyń uzyndyǵy 2,6 shaqyrym, bıiktigi 2-2,5 metr. Dambyda 10 shlıýz ornalasqan. Qazir ony jóndeý máselesi sheshilip jatyr.
Birinshi vıtse-premer Roman Sklıar Aqtóbe oblysyndaǵy sý tasqyny jaǵdaıymen jáne júrgizilip jatqan jumystardy úılestirý barysymen tanysqanyn jazǵan bolatynbyz.
