Roman Sklıar Aqmola oblysyndaǵy jylytý maýsymyna daıyndyq barysyn tekserdi
ASTANA. KAZINFORM – Aqmola oblysyna jumys sapary aıasynda Premer-Mınıstrdiń birinshi orynbasary Roman Sklıar Stepnogorsk jáne Kókshetaý qalalarynyń jylýmen jabdyqtaý kózderindegi jóndeý jumysynyń barysymen tanysty. Bul týraly Úkimettiń baspasóz qyzmeti habarlady.
Roman Sklıar Stepnogorsk qalasynyń JEO-daǵy qalanyń turǵyn úı sektoryn, Zavodskaıa kentin, sondaı-aq eldi meken aýmaǵyndaǵy kásiporyndardy jylýmen qamtamasyz etetin josparly jumystardy tekserdi. Nysandy jylytý maýsymyna daıyndaýǵa bıyl 7,4 mlrd teńge bólingen. Eki qazandyq agregatyn bólshekteý, týrbogeneratorlarǵa kúrdeli jáne aǵymdaǵy jóndeý júrgizilip jatyr. Eki týrbogenerator boıynsha jumys aıaqtaldy.
Bıyl uzyndyǵy 7,5 km magıstraldy jylý jelilerin jóndeýge Úkimet rezervinen 2,7 mlrd teńge bólindi. Merdiger uıym qubyrdy bólshekteý jáne tóseý jumysyn júrgizedi. Sonymen qatar qalada 9,6 km jylý jelisin rekonstrýktsııalaý jobasy iske asyryla bastady. Birinshi vıtse-premer jylytý maýsymynyń kedergisiz ótýi úshin jumystyń sapasyn ári merziminde aıaqtalýyn qamtamasyz etýdi tapsyrdy.
Kókshetaý qalasynda R.Sklıar AQ-1 jáne AQ-2 qazandyqtaryn qarap shyqty. Úkimet rezervinen bólingen 3,7 mlrd teńge esebinen jylý kózderin, jylý jelilerin jóndeý, qoımaljyń jetkizgish qubyrlarynyń suıyltý júıesin rekonstrýktsııalaý jáne kúl úıindisi shuńqyrynyń bógetin ulǵaıtý jumystary júrgizilip jatyr.
Premer-Mınıstrdiń birinshi orynbasary Oblys ortalyǵynda árqaısysy 1,5 myń oryndyq eki jaıly mekteptiń qurylys barysymen tanysty. Nysandarda kirpish qalaý, árleý, syrtqy jáne ishki ınjenerlik jelilerdi ornatý, tereze bloktaryn ornatý jumysy júrgizilip jatyr. Roman Sklıar qurylystyń belgilengen merzimde sapaly aıaqtalýyn qamtamasyz etý qajet ekenin atap ótti.
Birinshi vıtse-premer M.Ǵabdýllın kóshesindegi (Aqan seri kóshesinen Ýálıhanov kóshesine deıin) jol ýchaskesin rekonstrýktsııalaý jumysymen tanysty. Aqan seri kóshesinen Naýryzbaı batyr kóshesine deıingi jylý magıstraliniń ótkizý bóligin keńeıtý jáne qaıta jańartý josparlanǵan.
R.Sklıarǵa osy jyldyń 1 qyrkúıegine deıin jylý jelileri boıynsha jumysty oryndaý josparlanǵany, ýchaskeni jóndeý 2025 jyly aıaqtalatyny baıandaldy.
