Roman Gonsales chempıondyq ataǵynan aıyryldy
ASTANA. QazAqparat - Golovkın-Djeıkobs jekpe-jeginiń anderkarty aıasynda nıkaragýalyq Roman Gonsales (46-0, 39 KO) ekinshi asa jeńil salmaqtaǵy WBC belbeýin qorǵaýy úshin taı boksshysymen jekpe-jekke shyqty, dep xabarlaıdy QazAqparat tilshisi.
Osy ýaqytqa deıin birde-bir ret jeńilmegen Gonsales alǵashqy raýndtarda utylatyndaı bolyp kóringen edi. Sebebi taı boksshysy Srısaket Sor Rýngvısaıdyń (41-4-1, 38 KO) joıqyn soqqylary dittegen jerine jetti, tipti oń qolmen jibergen bir xýky chempıonnyń búıirine tıip, nokdaýnǵa túsirdi. Al úshinshi raýndta Gonsales basynan jaraqat aldy. Degenmen, nıkaragýalyq boksshy birte-birte jekpe-jekti óz qolyna aldy. Óz shabýyldaryn údetip, qarsylastyń mysyn basty. Osy kezde Rýngvısaı qýlyqqa basty. Baspen chempıonnyń jaraqatynan uryp, texnıkalyq nokaýtqa jetkizýge tyrysty. Alaıda kásibiı tóreshi onyń bárin baıqap turdy. Bir-eki ret eskertý jasaǵannan keıin Rýngvısaıdyń bir upaıyn shegerdi. Soǵan qaramastan, alǵan soqqylardan Gonsalestiń jaraqaty qanaı berdi, taı boksshysynyń betine de, denesine de shashyrady.
Sońǵy raýndtarda eki boksshy da jyldamdyqtaryn údetti. Ekeýiniń de daıyndyqtary joǵary ekeni baıqaldy. Alaıda Roman Gonsalestiń keıbir soqqylary aýa qarmap qaldy. Basynan da, qabaǵynan da sorǵalaǵan qan kedergi jasady. Al taı boksshysy erkin qımyldap, upaıdy eseleýge kúsh saldy. Jekpe-jektiń sońynda onyń da qabaǵy jaryldy. Tóreshilerdiń sheshimi boıynsha taı bokshysy upaı sanymen utyp, asa jeńil salmaqtaǵy WBC chempıony atandy.
Aıta keteıik, dál osy jekpe-jekten keıin orta salmaqta WBA (Super), IBO, WBC jáne IBF nusqalary boıynsha álem chempıony Gennadıı Golovkın (36-0, 33 KO) men WBA (Regular) belbeýiniń ıegeri Denıel Djeıkobs (32-1, 29 KO) judyryqtasady.
