Rolan Garrostyń irikteý týrnıri: Eki tennısshi fınalǵa joldama aldy

ALMATY. KAZINFORM — Almaty qalasyndaǵy Gorky Tennis Park korttarynda Batys jáne Ortalyq Azııa boıynsha Rolan Garros irikteý týrnıriniń fınalyna shyqqandar belgili boldy.

Qyzdar arasynda birinshi jartylaı fınalda Erkejan Jańataeva túrikmenstandyq Ilıma Gýseınovamen kezdesti. Birinshi partııada qazaqstandyq tennısshi aıqyn basymdylyq kórsetti — 6:1. Ekinshi sette Gýseınova 3:0 esebimen alǵa shyqqanymen, Jańataeva tarazy basyn teńestirip qana qoımaı, matchty jeńispen támamdaı aldy — 6:3.

Ekinshi jartylaı fınalda qazaqstandyqtar Alısa Koroleva men Ádııa Omarbek arasyndaǵy match asa tartysty ótti. Birinshi partııa 7:6 (7:3) esebimen Alısanyń paıdasyna sheshildi. Degenmen budan keıin Ádııa kambek jasaı bildi — 6:3, 6:1.

Osylaısha, fınalda Erkejan Jańataeva men Ádııa Omarbek sheberlik baıqasady. Sheshýshi oıyn nátıjesine qaramastan, qos tennısshi de Japonııada ótetin Rolan Garrostyń qorytyndy irikteý saıysyna joldama aldy.

Eske sala keteıik, budan buryn Tsıntsınnatı týrnırinde Pýtıntsevany jeńgen tennısshiniń Rybakınamen oınaıtynyn jazǵan edik.