Rolan Garrostegi sensatsııa: Býblık álemniń 5-raketkasyn eline qaıtardy

ASTANA. KAZINFORM – Qazaqstannyń birinshi, álemniń 62-raketkasy Aleksandr Býblık Rolan Garros týrnıriniń shırek fınalyna ótti.

Qazaqstandyq tennısshi tórtinshi aınalymda álemniń 5-raketkasy, ulybrıtanııalyq, 23 jastaǵy Djek Dreıpermen kortqa shyqty.

Osyǵan deıin qarsylastar úsh ret kezdesip, sonyń ekeýinde Dreıper jeńgen edi. Bul olardyń topyraq tósenishindegi alǵashqy matchy edi. 

Birinshi partııada esep 5:5 bolǵan mezette ulybrıtanııalyq sportshy breık jasap ketti – 7:5.

Esesine ekinshi sette Býblık ese qaıyrdy – 6:3.

Qazaqstandyq tennısshi úshinshi setti 6:2 esebimen aıaqtady. 

Aleksandr tórtinshi partııany breıkpen bastady – 2:0. Aqyry matchty jeńispen túıindedi – 6:4. 

Eki saǵat 34 mınýtqa sozylǵan tartysty básekede Býblık 8 eıspen birge 6 breık-poınttyń beseýin múlt jibermedi. 12 eıs, 2 breıkpen (7 breık-poınt) erekshelendi.

Osylaısha, A.Býblık óz sporttyq jolynda alǵash ret Frantsııa ashyq chempıonatynyń shırek fınalyna shyqty.

Bul meniń ómirimdegi múmkindik edi. Sony paıdalana bilgenime qýanyshtymyn. Bárińizge myń alǵys! Endi kelesi oıynǵa daıyndalamyn, - dedi matchtan soń A.Býblık.

Aleksandr Býblık jartylaı fınalǵa shyǵý úshin álemniń 1-raketkasy, ıtalııalyq ıAnnık Sınner nemese reıtıngide 15-oryndaǵy reseılik Andreı Rýblevtiń qaı jeńgenimen talasady. 

Eske sala keteıik, budan buryn Elena Rybakınanyń Rolan Garrostyń tórt dúrkin chempıonyna jol bergenin jazǵan bolatynbyz.