Rolan Garros týrnırinde sátti óner kórsetsem deımin – Zańǵar Nurlanuly

ASTANA. KAZINFORM — Qazaqstannyń talantty jas tennısshileriniń biri – 16 jastaǵy Zańǵar Nurlanuly. Zańǵar bıyl óz sporttyq jolynda alǵash ret Aýstralııadaǵy «Úlken dýlyǵa» týrnırinde baq synady. Jas tennısshi aldaǵy arman-maqsaty jóninde Kazinform tilshisine áńgimelep berdi.

- Zańǵar, bıyl jasóspirimder arasynda «Úlken dýlyǵa» týrnırin Aýstralııadan bastadyń. Melbýrn korty qalaı eken? 

- Árıne, bul erekshe sát edi, men kezinde uly tennısshiler oınaǵan kortqa shyqtym. Azdap tolqydym, sodan keıin munda kezdeısoq kelmegenimdi sezindim. Men ár match saıyn aıryqsha sezimdi bastan keshtim. 

- Australian Open jarysynyń buryn óziń oınaǵan týrnırlerden aıyrmashylyǵy nede dep oılaısyń? 

- Bul mektepten birden ýnıversıtetke aýysqan kezdegideı sát (kúledi). Óıtkeni «Úlken dýlyǵa» degen ataýy-aq aıtyp tur ǵoı. Munda kort, uıymdastyrý, kórermender – bári de joǵary deńgeıde. Jasóspirimder sanaty bolsa da, ózińdi naǵyz kásibı oıynshy retinde sezinesiń. Kúsh-qýatyńdy sarqyp jumsaısyń, minbedegi ahýal, kameralar – bári jigerlendiredi. 

- Aýstralııada álemniń birinshi raketkasy, ıtalııalyq ıAnnık Sınnermen birge jattyqtyń. Bul qalaı bolyp edi jáne ol nesimen este qaldy? 

- Álemdik reıtıngi kóshbasshysymen birge jattyǵý aıryqsha sezimge bóleıdi. ıAnnık árdaıym jaýapkershilikti sezinedi, jattyǵýdyń ózinde 100 paıyz kúshin jumsaıdy. Meni onyń qarapaıymdylyǵy, usaq-túıekke deıin mán beretini súısindirdi. 

- Onymen jeke sóılestiń be? Sınner aqyl-keńesin berdi me?

- Iá, azdap til qatystyq. Ol únemi jumys istep, jattyǵý kerektigin aıtyp, tabys tiledi. Onyń bul sózderi janyma jaqty. 

- Aýstralııadaǵy óz ónerińdi qalaı baǵalaısyń? Nege qol jetti, áli qandaı baǵytta jumys isteý kerek?

- «Úlken dýlyǵa» týrnırinde alǵash ret óner kórsetkenime qaramastan, jaqsy oınadym deı alamyn. Sondaı-aq ózimniń kemshin jaqtarymdy da kórdim, onymen taıaý ýaqytta jumys isteýim kerek. Eń bastysy, úzdiktermen taıtalasa alatynymdy sezindim. Juptyq synda úndistandyq Krısh Tıadjımen birge ataqty Lleıton Hıýıttiń uly – Krýz ben horvatııalyq Dýıe Markovınaǵa qarsy oınadyq. Tartysty báseke úsh setke sozylyp, biz jeńisti julyp aldyq. Minbede halyq toly boldy, ahýal da soǵan saı edi. 

- Alda qandaı jarystar bar?

- Jasóspirimder synǵa túsetin J300 jáneJ200 sanatyndaǵy birneshe dodada, sondaı-aq sáýir aıynda Shymkentte eresekter arasynda ITF M15 týrnırinde baq synaımyn. Árıne, eger bári oıdaǵydaı bolsa, jasóspirimder arasynda 1-7 maýsymda ótetin Rolan Garrosqa qatysamyn. Bul men úshin ekinshi «Úlken dýlyǵa» bolmaq. Sondyqtan onda sátti óner kórsetip, tabysqa jetkim keledi. 

- Osy jyly aldyńa basqa qandaı maqsattar qoıyp otyrsyń?

- Jyl qorytyndysymen ITF jasóspirimder reıtıngisinde TOP-10-ǵa kirgim keledi, turaqty oıyn órnegin kórsetip, tıtýldarǵa qol jetkizsem deımin. Bul úshin biraq kóp jumys istep, úzbeı jattyǵý kerek. 

- Jeńilisterdi qalaı eńseresiń? Ózińe tán qalpyna kelý uǵymy bar ma? 

- Ár sportshy jeńiliske ushyramaı, júre almaıdy, bul – sportshynyń ajyramas bóligi. Men ár jeńilisti sabaq retinde túsinemin. Sabyrǵa kelip, kóńil-kúıimdi retke keltirý úshin ózime azyraq ýaqyt beremin – bul qalypty jaǵdaı. Sodan keıin taldaý jasaımyn: qalaı boldy, qaı jaǵyn jaqsartý kerek. 

- Uly ataný úshin tennısshi ne isteý kerek dep esepteısiń?

- Menińshe, uly ataný úshin tıtýldardyń kóptigi jetkiliksiz, sonymen qatar onyń minezi, eńbekqorlyǵy, qarsylasqa qurmeti, oıynnyń eń sońyna deıin berilmeı, taıtalasý, soǵan qaramastan, qarapaıym bolyp qalý úlken ról atqarady.

- Ázirge qandaı match erekshe este qaldy?

- 2022 jyly Parıjdegi jasóspirimder arasynda bedeldi Tennis Europe Tim Essonne týrnırindegi jeńis. Fınalda jergilikti tennısshini uttym, birinshi setti berip qoıǵanmen, kambek jasap, qalǵan eki partııany aldym. Jasóspirimder arasynda ótkenine qaramastan, uıymdastyrý deńgeıi joǵary boldy. Frantsııalyq tennısshi oınaǵandyqtan, halyq kóp jınalyp, oǵan qoldaý kórsetti. Men de aıanyp qalmadym.

- Qazirgi tańdaǵy kez kelgen tennısshimen kórme matchyn oınaýǵa múmkindik týsa, ony kimmen birge ótkizer ediń? 

- Men Novak Djokovıchti tańdar edim. Ol – meniń bala kúnnen pirim. Novaktyń oıyn stıli, kortta jep-jeńil qımyldaýy, korttan tys kezdegi tártibi – bári erekshe. Onymen kortta betpe-bet turýdyń ózi qurmet der edim. 

- Sońǵy saýal, bos ýaqytta nemen aınalysasyń?

- Tennısten qol bosaǵan ýaqytta óz otbasyńmen nemese dostaryńmen birge bolyp, kınoǵa baryp, shahmat oınap nemese jaı serýendeýdiń ózi baqyt dep edim. Keıde kitap oqyp, tartysty matchtardy kórgendi janym súıedi. Bul tynyǵýǵa septesedi. Degenmen jattyǵý men jarystan qol úzýge bolmaıdy, onda qalypty daǵdyńnan aıyrylyp qalasyń.

- Áńgimeńe rahmet. Sporttyq jolyńda tabys tileımin.

Eske sala keteıik, budan buryn Zańǵar Nurlanulynyń «Úlken dýlyǵa» týrnırinde alǵashqy jeńisine qol jetkizgenin jazǵan bolatynbyz.

16 jastaǵy Zańǵar Nurlanuly álemniń 1-raketkasymen birge jattyqty.