Rolan Garros týrnıri: Rybakına úshinshi aınalymda 2017 jylǵy chempıonmen oınaıdy

ASTANA. KAZINFORM – Qazaqstannyń birinshi, álemniń 11-raketkasy Elena Rybakına Rolan Garros týrnıriniń úshinshi aınalymyna shyqty.

Qazaqstandyq tennısshi ekinshi aınalymda dúnıejúzilik reıtıngide 129-orynda turǵan amerıkalyq, túbi serbııalyq, 17 jastaǵy Iva Iovıchpen sheberlik baıqasty.

Bıyl Aýstralııa ashyq chempıonatynda E.Rybakına jas tennısshini 6:0, 6:3 esebimen qapy qaldyrǵan edi.

Bul joly qazaqstandyq sportshy birinshi partııany óz paıdasyna jazdy – 6:3.

Ekinshi sette esep 1:1 bolǵan sátte Rybakına breık jasaı aldy. Aqyry matchty taǵy bir breıkpen túıindedi – 6:3.

Bir saǵat 15 mınýtqa sozylǵan básekede Rybakına 5 eıspen birge 10 breık-poınttyń tórteýin paıdalandy. Iovıch 1 breıkpen (3 breık-poınt) erekshelendi.

E.Rybakına nórtinshi aınalymǵa shyǵý úshin álemniń 21-raketkasy, latvııalyq, 2017 jylǵy Rolan Garros jarysynyń chempıony Elena Ostapenkomen talasady. E.Ostapenko ekinshi aınalymda reıtıngide 67-oryndaǵy amerıkalyq Kerolaın Doýlhaıdty joldan taıdyrdy – 5:7, 6:3, 6:3.

Taǵy bir qazaqstandyq, reıtıngide 233-satydaǵy Tımofeı Skatov Vıchentsa (Italııa) chellendjer týrnıriniń shırek fınalynan shet qaldy.

T.Skatov álemniń 182-inshi, osy jarystyń 6-raketkasy, aýstrııalyq Lýkas Noımaıermen asa tartysty match ótkizdi. Birinshi partııada Skatov 6:3 esebimen basymdylyq tanytqanymen, sol qarqynyn jalǵastyra almady – 6:7 (3:7), 4:6.

Úsh saǵat 10 mınýtqa sozylǵan básekede Skatov 5 eıspen birge 17 breık-poınttyń tek tórteýin paıdalandy. Noımaıer 3 eıs, 3 breıkpen (10 breık-poınt) kózge tústi.

Eske sala keteıik, budan buryn Jibek Qulambaevanyń Serbııadaǵy týrnırde reseılik sportshydan basym túskenin jazǵan bolatynbyz.