Rolan Garros týrnıri: Rybakına Tokıoda ketken eseni qaıtaryp, shırek fınalǵa shyqty

PARIJ. KAZINFORM – Qazaqstannyń birinshi, álemniń 4-raketkasy Elena Rybakına Rolan Garros týrnıriniń shırek fınalyna shyqty.

Qazaqstannyń kóshbasshy tennısshisi tórtinshi aınalymda Fılıpp Shatre kortynda dúnıejúzilik reıtıngide 2017 jyly úshinshi orynǵa deıin kóterilgen, qazir 19-satyda turǵan ýkraınalyq Elına Svıtolınaǵa qarsy keldi.

Qarsylastar osyǵan deıin úsh ret kezdesip, sonyń ekeýinde ýkraınalyq tennısshi basym túsken edi. Sonyń ishinde Tokıo olımpıadasynda qola júlde úshin básekede Svıtolınanyń baǵy janǵan-dy. Kóp uzamaı bastalatyn Parıj olımpıadasynda da qos tennısshi óz elderiniń namysyn qorǵaýy tıis.

Tokıodan keıin belgili frantsııalyq tennısshi Gael Monfıske turmysqa shyǵyp, sábıli bolyp úlgergen E.Svıtolına kortqa bir jyldaı buryn oralǵan edi.

Bul joly sportshylar matchty breık almasýmen bastady. Esep 2:2 bolǵan mezette Rybakına taǵy bir breıkpen alǵa shyqty – 4:2. Sodan keıin setke dop bergende, sátti oınady – 6:4.

Ekinshi setti Elena breıkpen bastady – 2:0. Esepti 4:1-ge jetkizgenimen, Svıtolına da barynsha tyrysyp baqty – 3:4. Degenmen Rybakına matchty breıkpen túıindedi – 6:3.

1 saǵat 9 mınýtqa sozylǵan báseke barysynda Rybakına 5 eıspen birge 7 breık-poınttyń beseýin múlt jibergen joq. Svıtolına 5 eıs, 2 breıkpen (3 breık-poınt) erekshelendi.

Elena Rybakına jartylaı fınalǵa shyǵý úshin álemniń 15-raketkasy, ıtalııalyq ıAsmıne Paolını nemese reıtıngide 70-oryndaǵy reseılik Elına Avanesıannyń qaı jeńgenimen sheberlik talastyrady.

Eske sala keteıik, budan buryn qazaqstandyq tennısshiniń Týnıstegi týrnırdiń chempıony atanǵanyn jazǵan bolatynbyz.