Rolan Garros týrnıri: Elena Rybakına tartysty matchta jeńiske jetti

ASTANA. KAZINFORM — Qazaqstannyń birinshi, álemniń 11-raketkasy Elena Rybakına Rolan Garros týrnırin sátti bastady.

Parıjde ótip jatqan Frantsııa ashyq chempıonatynyń alǵashqy aınalymynda qazaqstandyq tennısshi dúnıejúzilik reıtıngide 202-oryndaǵy argentınalyq, 22 jastaǵy, irikteý saıysy jeńimpazdarynyń biri Hýlııa Rıeramen kezdesti.

Birinshi partııada eki breık jasaǵan Rybakına 5:1 esebimen alǵa ketti. Sosyn setke dop bergende, qınala qoıǵan joq — 6:1.

Ekinshi set barysynda Elena eki ret alǵa shyqqanymen, Rıera qarymta qaıyryp, aqyry óz esebine jazdy — 6:4.

Úshinshi, sheshýshi sette qazaqstandyq tennısshi tarazy basyn aýdara bildi — 6:4.

Bir saǵat 45 mınýtqa sozylǵan báseke barysynda Rybakına 7 eıspen birge 12 breık-poınttyń jeteýin paıdalandy. Rıera 4 eıs, 5 breıkpen (8 breık-poınt) kózge tústi.

Elena Rybakına úshinshi aınalymǵa shyǵý úshin reıtıngide 129-satydaǵy amerıkalyq, 17 jastaǵy Iva Iovıchpen talasady.

Amerıkalyq tennısshi 3 saǵatqa sozylǵan bastapqy kezdesýinde álemniń 74-raketkasy, meksıkalyq Renata Sarasýany 6:3, 5:7, 6:4 esebimen tize búktirdi.

Ótken jyly Rolan Garrosta Polsha ókili Iga Shventek chempıon atansa, E.Rybakına shırek fınalǵa deıin jetken edi. Qazaqstandyq tennısshi reıtıngilik upaıynan aıyrylmaýy úshin kem degende ótken jylǵy jetistigin qaıtalaýy kerek. 

Eske sala keteıik, budan buryn Elena Rybakınanyń WTA chempıondyq kestesinde úzdik segizdikke engenin jazǵan bolatynbyz.

Sondaı-aq Jibek Qulambaeva álemdik reıtıngide birden 28 satyǵa joǵary kóterildi.