Rolan Garros týrnıri: Elena Rybakına 1/8 fınalǵa ótti

PARIJ. KAZINFORM – Qazaqstannyń birinshi, álemniń 4-raketkasy Elena Rybakına Parıjde ótip jatqan Frantsııa ashyq chempıonatynyń tórtinshi aınalymyna ótti.

Qazaqstandyq tennısshi úshinshi aınalymda kezinde dúnıejúzilik reıtıngide 27-satyda turǵan belgııalyq Elıze Mertenspen jolyǵysty. 

Osyǵan deıin qarsylastar bes ret kezdesip, sonyń tórteýinde Rybakına jeńiske jetken edi. Bul joly birinshi partııada Mertens eki ret breık jasap, Elena tarazy basyn teńestirip otyrdy. Sodan keıin ózi úshinshi ret breıkke qol jetkizip, setke dop bergende, múmkindigin múlt jibermedi – 6:4. Ekinshi sette esep 2:1 bolǵan sátte Rybakına breık jasaı bildi – 3:1. Aqyry ol matchty taǵy bir breıkpen túıindedi – 6:2.

Bir saǵat 7 mınýtqa sozylǵan báseke barysynda qazaqstandyq sportshy 3 eıspen birge 6 breık-poınttyń beseýin paıdalandy. Mertens 2 breıkpen (3 breık-poınt) shekteldi.

Elena Rybakına shırek fınalǵa shyǵý úshin álemniń 19-raketkasy, ýkraınalyq Elına Svıtolına nemese reıtıngide 64-oryndaǵy rýmynııalyq Ana Bogdannyń qaı jeńgenimen talasady. 

Atalmysh «Úlken dýlyǵa» týrnırinde jekeleı synda Qazaqstannan E.Rybakına ǵana qaldy. 

Ótken jyly Rolan Garros dodasynda E.Rybakına úshinshi aınalymnan asa almaǵan edi. 

Eske sala keteıik, budan buryn Jibek Qulambaevanyń Italııadaǵy týrnırdiń fınalyna shyqqanyn jazǵan bolatynbyz.