Rolan Garros týrnıri: Almatyda irikteý jarysynyń fınalyna qos qazaqstandyq shyqty
ASTANA. KAZINFORM — Almatyda 16 jasqa deıingi tennısshiler arasynda ótip jatqan Roland Garros Junior Series by Renault — Qualifications West and Central Asia halyqaralyq irikteý týrnıri máresine jaqyndap keledi.
Qazaqstan tennıs federatsııasynan málim etkenindeı, «Gorky Tennis Park» kesheniniń topyraq tósenishindegi korttarynda Ortalyq jáne Batys Azııa elderiniń úzdik jas tennısshileri baq synap, olardyń arasynda fınalǵa shyqqandar anyqtaldy.
Uldar arasyndaǵy básekede birinshi oryn úshin qazaqstandyq Rodıon Traıgel synǵa túsedi. Sheshýshi matchqa deıin ol aldymen sırııalyq Mýhamad Eıad Salımdi 6:3, 5:7, 6:2 esebimen tize búktirdi. Keıin otandasy Ámir Asqardan 6:2, 6:4 esebimen basym tústi.
Rodıonnyń fınaldaǵy qarsylasy — Iran ókili Kıarash Sadegızeıdı. Ol buǵan deıin túrikmenstandyq Aly Geldyev pen qazaqstandyq Beksultan Baýyrjanovty jeńdi.
Qyzdar arasyndaǵy jarysta Qazaqstannan Alýa Marat sátti óner kórsetýde. Alýa aldymen Elızaveta Nıgmatýlınany — 6:3, 6:3, odan keıin úsh setke sozylǵan tartysty kezdesýde Aıym Qanaǵatovany 7:5, 5:7, 6:2 esebimen qapy qaldyrdy.
A.Marat fınalda ózbekstandyq Aleksandra Barmıchevamen bas júldeni sarapqa salady. Ózbekstandyq sportshy qazaqstandyqtar Ámına Nurmahan men Támına Sákendi joldan taıdyrdy.
Jarystyń sońǵy matchtary 22 tamyzda ótedi. Oıyn saǵat 10.00-de bastalady. Fınaldyq kezdesýlerden bólek, qatysýshylar qorytyndy kestedegi ózge de oryndar úshin kortqa shyǵady.
Іrikteý kezeńiniń jeńimpazdary qazan aıynda Japonııada ótetin Roland Garros Junior Series fınaldyq kezeńine joldama alady
Eske sala keteıik, budan buryn Almatyda jasóspirimder arasynda Rolan Garros týrnıriniń irikteý jarysy ótetinin jazǵan edik.
