«Rolan Garros»: Rybakına irikteý saıysynyń fınalyna shyqty
NUR-SULTAN. QazAqparat - Qazaqstandyq tennısshi Elena Rybakına «Rolan Garros» týrnıri irikteý saıysynyń fınalyna shyqty, dep habarlaıdy QazAqparat tilshisi.
Dúnıejúzilik reıtıngte 135-orynda turǵan qazaqstandyq sportshy irikteý jarysynyń jartylaı fınalynda kanadalyq, álemniń 147-raketkasy Rebekka Marınomen kúsh synasty.
Birinshi partııada óz múmkindikterin sátti paıdalanǵan kanadalyq tennısshi 7:5 esebimen jeńiske jetti.
R.Marıno ekinshi set barysynda da breık jasap, alǵa shyqty. Matchta jeńilý qaýpi tóngen E.Rybakına baryn saldy. Aqyry ol taı-breıkte basymdylyǵyn tanyta bildi - 7:4.
Úshinshi, sheshýshi partııada esep 4:4 bolǵan mezette Elena breık jasaı aldy. Sodan keıin ózi matchqa dop bergende, qatelese qoıǵan joq - 6:4.
Asa tartysty ótken báseke 2 saǵatqa sozyldy.
E.Rybakına negizgi týrnırge joldama alý úshin irikteý saıystarynyń 12-raketkasy bolyp tirkelgen, reıtıngte 123-satyda turǵan japonııalyq Nao Hıbınomen talasady.
Eske sala keteıik, budan buryn Elena Rybakınanyń «Rolan Garros» týrnıriniń irikteý saıysyn sátti bastaǵanyn, al Qazaqstannyń birinshi raketkasy ıÝlııa Pýtıntsevanyń Nıýrnberg týrnıriniń shırek fınalyna shyqqanyn jazǵan bolatynbyz.
