Rolan Garros: Býblık sensatsııa jasap, alǵash ret úshinshi aınalymǵa ótti

ASTANA. KAZINFORM – Qazaqstannyń birinshi, álemniń 62-raketkasy Aleksandr Býblık Rolan Garros týrnıriniń úshinshi aınalymyna shyqty.

Qazaqstandyq tennısshi Frantsııa ashyq chempıonatyndaǵy ekinshi kezdesýin álemniń 9-raketkasy, aýstralııalyq Aleks de Mınaýrmen ótkizdi.

Býblık sporttyq jolynda osy kezge deıin Rolan Garrosta úshinshi aınalymǵa ótip kórmegen edi. 

Bastapqy eki partııa 6:2 esebimen aýstralııalyq tennısshiniń paıdasyna sheshildi. Úshinshi sette Býblık 3:0 esebimen alǵa shyqqanymen, basymdylyqty ustap tura almady – 4:4. Degenmen ol taǵy bir breıkke qol jetkizdi – 6:4.

Tórtinshi partııada esep 2:1 bolǵan mezette qazaqstandyq tennısshi breık jasaı aldy – 3:1. Sodan keıin setti ádemi túıindedi – 6:3. 

Býblık besinshi, sheshýshi setti breıkpen bastady – 2:0. Taǵy bir breık – 4:1. Sosyn matchqa dop bergende, múmkindigin jibergen joq – 6:2.

Eki saǵat 52 mınýtqa sozylǵan básekede Býblık 12 eıspen birge 14 breık-poınttyń altaýyn óz esebine jazdy. Aýstralııalyq sportshy 4 eıs, 6 breıkpen (13 breık-poınt) kózge tústi. Osylaısha, A.Býblık Rolan Garros dodasynda alǵash ret úshinshi aınalymǵa joldama aldy. 

Aleksandr Býblık tórtinshi aınalymǵa shyǵý úshin álemniń 19-raketkasy, chehııalyq, 19 jastaǵy ıAkýb Menshık nemese reıtıngide 200-satydaǵy portýgalııalyq Enrıke Roshanyń qaı jeńgenimen talasady.

Eske sala keteıik, budan buryn Rolan Garros týrnırinde Rybakınanyń úshinshi aınalymda 2017 jylǵy chempıonmen oınaıtynyn jazǵan bolatynbyz.