Róli oń jaqtaǵy kóliktermen jolaýshy tasymaldaýǵa tyıym salyna ma
ASTANA. KAZINFORM — QR Ónerkásip jáne qurylys mınıstri Ersaıyn Naǵaspaev róli oń jaqtaǵy avtokólikterdi qalaaralyq jolaýshylar tasymalynda paıdalanýǵa tyıym salý múmkindigine qatysty pikir bildirdi.
Mundaı suraqty jýrnalıster mınıstrge Úkimet otyrysynan keıingi brıfıng barysynda qoıdy. Tilshiler róli oń jaqtaǵy shaǵyn avtobýstardyń qalaaralyq jolaýshylar tasymalynda keńinen qoldanylatynyn jáne olardyń jol-kólik oqıǵasyna jıi ushyraıtynyn atap ótti.
Ersaıyn Naǵaspaevtyń aıtýynsha, jol qozǵalysy qaýipsizdigi máselesi keshendi tásildi talap etedi jáne bul tek Ónerkásip jáne qurylys mınıstrliginiń ǵana emes, Іshki ister mınıstrliginiń de jaýapkershiligine kiredi.
— 2007 jyldan beri Qazaqstanǵa róli oń jaqtaǵy avtokólikterdi ákelýge tyıym salynǵan. Sondyqtan bul eń basty másele — qoldanystaǵy tyıymnyń saqtalýyn baqylaý, — dedi mınıstr.
Jýrnalısterdiń qalaaralyq jolaýshylar tasymalynda róli oń jaqtaǵy avtokólikterdi paıdalanýǵa tyıym salý máselesi qaralyp jatyr ma degen suraǵyna mınıstr jol qaýipsizdigine jaýapty Іshki ister mınıstrligine júginý kerektigin aıtty.
Sonymen qatar, ol ózi basqaryp otyrǵan mınıstrlik tarapynan qajetti sharalar qabyldanǵanyn atap ótti.
Aıta keteıik, buǵan deıin maýsym aıynda 167,8 myń avtokólik esepke qoıylǵanyn jazǵanbyz.
