Rodjer Federer men Novak Djokovıch - fınalda!
ASTANA. QazAqparat - Úlken tennısten Amerıka ashyq dodasy óz máresine jetip te qaldy. Erteń, jeksenbi kúni tennısten erler arasynda fınaldyq keremet kezdesý ótedi. 13 qyrkúıek kúni Amerıka jurtshylyǵy aldynda shveıtsarııalyq Rodjer Federer men serbtik Novak Djokovıch kim myqty ekenin anyqtaıdy.
Aıta ketý kerek, keshe jartylaı fınal oıyndary ótti. Erler synynda eki favorıt óz matchtaryn bir demmen ótkizip, qarsylastaryna eshqandaı múmkindik bermedi. Árıne, ol ekeýi osy jyldyń, múmkin tipti sońǵy jyldardyń keremet tennısshileri deı alamyz. Álemdik reıtıngte birinshi turǵan serbtik Novak Djokovıch pen shveıtsarııalyq maestro, úsh márte álemniń úzdik sportshysy atanǵan, 34 jasar Rodjer Federer arasynda taǵy da keremet fınaldyq oıyn ótedi.
Olar osy jyldyń ózinde bes ret fınalda kezdesti. Úsheýin Novak utqan bolsa, qalǵan ekeýin Federer óz paıdasyna sheshken edi. Federer 2009 jyldan beri osy AQSh chempıonatynyń fınalyna shyǵa almaı júrdi. Osy jyly bapkeri Stefan Edberg pen Severen Lıýtıdiń keńes berýimen úlken daıyndyqtar júrgizip, joǵary jetistikterin jalǵastyrýda. Federer osy chempıonatta bir de bir set utylmaǵan jalǵyz tennısshi.
Eki tennısshi de jartylaı fınaldyq oıyndaryn senimdi jáne az ýaqyttyń ishinde ótkizýdi jón kórdi. Jeksenbilik fınaldyń aldynda ózderiniń barynsha jaqsy oıyn deńgeıine shyǵa bilgendikterin dáleldegen eki talantty tennısshilerdiń keremet fınalyna qaıta tánti bolamyz. Endigi oıyndary ózara 42-shi kezdesýleri bolady. Aralaryndaǵy esep 21-20 Federer paıdasynda bolyp otyr.
Buǵan deıin habarlaǵanymyzdaı, bul joly sensatsııa áıelder arasyndaǵy synda boldy. Óziniń kezekti chempıondyǵyna senimdi ótip kele jatqan birinshi raketka Serena Ýılıams pen álemniń ekinshi raketkasy Sımona Halep oılamaǵan jerden jeńilis tapty. Italıandyq tennısshi Roberto Vınchı Serenaǵa qarsy óte tııanaqty oıyn kórsetip, jeńistiń kiltin taba aldy. Esep 6-2, 4-6, 4-6. Osylaısha, Roberto óziniń Úlken dýlyǵa deńgeıindegi saıystaryndaǵy alǵashqy fınalyna shyqty. Sımona Halep te ıtalııanyń beldi tennısshi qyzy Flavıa Pennetaǵa utyldy. Sóıtip, búgin ótetin Amerıka ashyq chempıonatynyń aqtyq synyna makaron men modanyń úzdigi bolyp ketken eldiń názik jandy ókilderi shyqty.
Tartysty kezdesýdi Qazaqstan kórermenderi «Eýrosport» telearnasy arqyly kórý múmkindigine ıe bolýda.
