Rodına aýylynda órt sóndirý beketi ashyldy - Aqmola oblysy
«Rodına» agrofırmasy» seriktestiginiń aýmaǵynda ornalasqan órt sóndirý beketiniń ashylýyna Aqmola oblysy Tótenshe jaǵdaılar departamenti bastyǵynyń orynbasary Manarbek Shapaǵatov, oblystyq máslıhattyń depýtaty Andreı Verevkın, aýyldyq okrýgtiń ákimi Talǵat Muqyshev jáne aýyl turǵyndary qatysty.
Nysan 2019-2020 jyldarǵa arnalǵan Aqmola oblysynyń eldi mekenderinde kezeń-kezeńimen sóndirý beketterin qurý josparyn júzege asyrý sheńberinde ashylyp otyr.
Órt sóndirý beketi jylytylatyn bokspen qamtamasyz etilgen, telefon baılanysy jumys isteıdi. Tórt qyzmetker jáne bir órt sóndirý avtokóligi bar. Órt sóndirý beketi 2000 astam turǵyny bar úsh eldi mekenge, ıaǵnı, Sadovoe jáne Zelenyı Gaı aýyldaryna qyzmet kórsetedi.
«Rodına aýylyndaǵy órt sóndirý beketi oblysymyzda ashylyp otyrǵan 25-shi nysan. Onyń barlyǵy jergilikti atqarýshy organdarmen birlesip ashylǵan. Jańadan qurylǵan komanda tek órtti sóndirip qana qoımaı, sonymen qatar olardyń jaýapkershilik aımaǵynda bolǵan basqa da tótenshe jaǵdaılardy joıýǵa qatysady, qıyn jaǵdaıǵa tap bolǵan adamdarǵa, halyqqa kómek kórsetedi», - deıdi Aqmola oblysy Tótenshe jaǵdaılar departamenti bastyǵynyń orynbasary Manarbek Shapaǵatov.
