Rodına aýylyndaǵy zańsyzdyq: 2 mlrd teńgeniń jobasyn qolǵa alǵan merdigerge aıyppul salyndy
Aqmola oblysynyń Tselınograd aýdanynda saýyqtyrý keshenin salyp jatqan merdigerge aıyppul salyndy, dep habarlaıdy Kazinform.
Aqmola oblysy ákimdiginiń baspasóz qyzmetiniń málimetinshe, aımaq basshysy Marat Ahmetjanovtyń tapsyrmasy boıynsha óńirde turǵyndar úshin ómirlik mańyzy zor nysandardyń qurylysy men jóndeý jumystarynyń sapasyna tekseris júrgizilip jatyr.
Aqmola oblysy boıynsha memlekettik sáýlet-qurylys baqylaý departamenti Tselınograd aýdany Rodına aýylyndaǵy dene shynyqtyrý-saýyqtyrý kesheniniń qurylysyn tekserdi. Bul joba boıynsha merdigermen eki jylǵa jalpy somasy 2 mıllıard teńgeden astam somaǵa kelisimshart jasalǵan.
Nysannyń irgetasyn salý kezinde qoldanystaǵy memlekettik standarttardy buzý derekteri anyqtaldy.
«Merdiger «Rıgolıt» JShS-ne qatysty júrgizilgen tekseristiń qorytyndysy boıynsha QR Ákimshilik quqyqbuzýshylyq kodeksiniń 312-baby 2-bóligine sáıkes 800 aılyq eseptik kórsetkish mólsherinde aıyppul salý jóninde ákimshilik quqyq buzýshylyq týraly hattama toltyryldy. Buzýshylyqtardy joıý týraly uıǵarym shyǵaryldy. Tselınograd aýdandyq sotynyń 2023 jylǵy 29 jeltoqsandaǵy qaýlysymen QR Ákimshilik quqyqbuzýshylyq kodeksiniń 312-baby 2-bóligi negizinde «Rıgolıt» JShS jobadan aýytqyǵany úshin lıtsenzııasynan aıyrýsyz 1 932 000 teńge mólsherinde ákimshilik aıyppul salý túrinde ákimshilik jazaǵa tartyldy», - dedi vedomstvodan.
Eske salaıyq, Aqmola oblysynda er adam jumys ornynan 34 mln teńge jymqyrdy.
