«Rodına AF» Astanaǵa kúnine 50 tonna sút ónimderin jetkizýdi kózdep otyr
ASTANA. QazAqparat - Aqmola oblysy Tselınograd aýdany Rodına aýylyndaǵy "Rodına AF" JShS sút zaýyty óndirisiniń qýattylyǵyn arttyrmaq, dep habarlaıdy QazAqparat.
«Rodına» agrofırmasynyń negizgi jumysy eginshilik pen mal sharýashylyǵyna baǵyttalǵan. Jylyna shamamen munda 6 mıllıard teńgeniń ónimi óndiriledi. Eńbek ónimdiligi ər aýyl turǵynyna jylyna 11 mln teńgeden keledi. Qazirgi ýaqytta eginshilikten góri mal sharýashylyǵynda aıtarlyqtaı damý bar" - dedi Rodına aýylyna baspasóz týryna barǵan BAQ ókilderine «Rodına AF» JShS dırektorynyń orynbasary Andreı Verevkın.
Onyń aıtýynsha, 2012 jyly sút zaýytynyń irgesi kóterilip, aýyldaǵy shıkizattyń (ıaǵnı súttiń) bərin sol zaýytta qaıta óńdeý bastalyp ketken. Saýylatyn sıyrdyń barlyǵy qysy-jazy mal qoradan shyǵarylmaı, azyqtanady. Əý basta sút zaýytynyń jumysy 5-7 tonnamen bastalǵan. Qazirgi tańda Astanaǵa kúnine 30-35 tonna sút ónimderin tasymaldap otyr.
"Ózderińiz biletindeı, sútten óndiriletin ónimderimiz ár túrli. Sútten basqa kilegeı, aıran, irimshik sekildi ónimderdi óndirip jatyrmyz. Sonymen birge, ónimderdiń taǵy 2-3 túrin óndirý qolǵa alynýda. Aýylda shamamen 1740 turǵyn bar. Bul - Sadovaıa, Rodına jáne Zelenyı gaı aýylynyń turǵyndary. Bizdiń aýyldyń halqy 100 paıyz tolyǵymen jumys isteıdi" - deıdi ol.
Andreı Verevkınniń aıtýyna qaraǵanda, halyqtyń negizgi bóligi agrofermada eńbek etedi. Aýyldyń qalǵan júzge jýyq turǵyny bilim, densaýlyq, quqyq qorǵaý salasynda jumys atqarady. Aýyldaǵy halyqtyń bári de kásiporyn tarapynan beriletin jeńildikke ıe.
Al «Aýylda jáne agrofermada qandaı másele bar?» degen suraqqa kásiporyn ókili kelesideı jaýap berdi.
«Máseleni másele retinde emes, baǵyndyratyn asý dep bilemiz. Bizdiń alǵa qoıǵan mindetimiz - Astana naryǵynda salmaǵymyzdy ósirý. Bizde tek qana shıkizattyń jetispeýi ǵana seziledi. Áıtpese, kúnine 100 tonna sútti óńdep, satýǵa qaýqarymyz bar. Bizge kerek deseńiz, elordadan qońyraý shalyp, kilegeı qaıda, sút qaıda dep surap jatady. Zaýyttyń ózi 50 tonna sútti óńdeýge arnalǵan. Sondyqtan, biz joq degende sút zaýytynyń qýattylyǵyn 50 tonnaǵa jetkizýdi maqsat tutyp otyrmyz», - dep túıdi Andreı Verevkın.
Aıta ketsek, qazirgi ýaqytta Premer-Mınıstrdiń orynbasary - Aýyl sharýashylyǵy mınıstri Ómirzaq Shókeev búgin "Rodına AF" JShS-ne baryp, biregeı kəsiporynnyń jumysymen tanysty. Atalǵan kəsiporyn kóp salaly baǵytta jumys júrgizýmen qatar sońǵy úlgidegi tehnologııalarmen ónim óndirýde.
