Roche men Pfizer Qazaqstanda dári-dármek óndiredi
ASTANA. KAZINFORM - Densaýlyq saqtaý mınıstrligi Pfizer jáne Roshe kompanııalarynyń Qazaqstanda dári-dármek óndirýine qatysty túsinik berdi.
«Qazirgi kezde tehnologııalar transferti men jańa ázirlemelerdi qamtamasyz etý úshin qajet ınvestıtsııalardy tartý boıynsha jumystar atqarylyp jatyr. BIGPHARMA farmatsevtıkalyq kompanııasymen, sondaı-aq kelisimsharttyq óndiris jobalary boıynsha AQSh, Shveıtsarııa, Ońtústik Koreıa, Túrkııa, Germanııa jáne Japonııadan kelgen basqa ınvestorlarmen jobalar iske asyrýdyń ártúrli kezeńderinde tur. Osy jobalardy Qazaqstan Respýblıkasynyń aýmaǵynda iske asyrý ınnovatsııalyq biregeı dári-dármekti alýǵa jáne ozyq medıtsınalyq tehnıkanyń múmkindikterin emin-erkin paıdalanýyn qamtamasyz etýge múmkindik beredi», - delingen Densaýlyq saqtaý mınıstrliginiń Kazinform agenttigine bergen jaýabynda.
Atap aıtqanda, 2024 jylǵy ekinshi jartyjyldyqtan bastap «Nobel Almaty farmatsevtıkalyq fabrıkasy» AQ bazasynda Roche kompanııasynyń isikke qarsy preparattaryn shyǵarý josparlanǵan.
«Sonymen qatar, Pfizer kompanııasymen Qazaqstan Respýblıkasynda «Prevenar-20» pnevmokokkty vaktsınany oqshaýlaý jobasy boıynsha jumys atqarylyp jatyr. Qazir ınvestıtsııalar týraly kelisimniń jobasy pysyqtalýda. Vaktsına óndirisiniń bastalý kezeńi ınvestıtsııalar týraly kelisimde aıqyndalady», - dep atalyp ótken mınıstrlik aqparatynda.
Budan buryn habarlanǵandaı, Densaýlyq saqtaý mınıstrligi elimizdegi dárilik zattar men medıtsınalyq buıymdar naryǵyndaǵy ımport úlesine qatysty málimet berdi.
«Qazaqstan Respýblıkasy Strategııalyq josparlaý jáne reformalar agenttiginiń deregi boıynsha, 2022 jyly farmatsevtıka salasynyń óndirisi 162,6 mlrd teńge boldy. 2023 jyldyń 11 aıynda óndiris kólemi 131,0 mlrd teńgege jetti. Sonymen qatar Qarjy mınıstrliginiń derekterine qaraǵanda, 2022 jyly eksport kólemi 32,2 mln AQSh dollary, ımport 1,7 mlrd AQSh dollary shamasynda boldy. Al 2023 jyldyń 11 aıynda farmatsevtıka ónerkásibiniń eksporty 14,4 mln AQSh dollaryn, al ımport 1,6 mlrd AQSh dollaryn qurady», - delingen vedomstvo aqparatynda.
