Robototehnıkadan álem chempıonaty: Qazaqstan quramasy 12 marapatqa ıe boldy
ASTANA. KAZINFORM — Qazaqstannyń robototehnıka quramasy FIRST álem chempıonatynda tabysty óner kórsetip, 12 marapat jeńip alyp, oqýshylardyń joǵary daıyndyq deńgeıin dáleldedi, dep habarlaıdy Oqý-aǵartý mınıstrliginiń baspasóz qyzmeti.
Jarystar George R. Brown Convention Center alańynda ótip, álemniń túkpir-túkpirinen 50 000-nan astam qatysýshyny biriktirdi. Qazaqstan atynan rekordtyq 225 oqýshydan quralǵan delegatsııa qatysty.
Tórt kúnge sozylǵan jarys qorytyndysy boıynsha qazaqstandyq komandalar barlyq sanattarda joǵary nátıjeler kórsetti.
Kishi sanat FIRST LEGO League Explore aıasynda Almaty qalasynan «Alem Innovators» komandasy Core Values Award nomınatsııasynda jeńiske jetti, al Haileybury Astana mektebiniń DeepSeekers komandasy Team Model Award marapatyna ıe boldy.
Orta sanat FIRST LEGO League Challenge boıynsha Túrkistan oblysynan Tolebi Daryn komandasy álemniń top 5 qataryna enip, Champions Award fınalısti atandy. Almaty qalasynyń Fiztex komandasy Core Values Gracious Professionalism Award nomınatsııasynda jeńiske jetti. Oral qalasyndaǵy Zııatkerlik mektebiniń Tidal Tumble komandasy robot oıynda 545 upaıdyń 535-in jınap, úzdik nátıjelerdiń birin kórsetti.
— Joǵary sanat FIRST Tech Challenge boıynsha Qaraǵandy qalasynyń JelToqSun komandasy Sustainability Award nomınatsııasynda altyn ıelendi. Shymkent qalasyndaǵy Zııatkerlik mektebiniń Overtime, Astana qalasyndaǵy Respýblıkalyq fızıka matematıka mektebiniń Fizmat Robotics jáne Almatydaǵy Polytech mektebiniń KAP komandalary Reach Award boıynsha altyn aldy. Almatydaǵy Polytech mektebiniń TGJ, Zııatkerlik mektebi Almaty Medeý fılıalynyń Panheya jáne Almatydaǵy BIL mektebiniń SANA komandalary osy nomınatsııada júldeger atandy. Astana qalasyndaǵy Zııatkerlik mektebiniń XCeption komandasy Think Award boıynsha qola júlde ıelendi, — delingen habarlamada.
BIL Şýchınsk qalasynan Celestial jáne Panheya komandalary alǵash ret Qazaqstan atynan top 8 qataryna enip, pleı off kezeńinde alıans kapıtandary atandy. Haileybury Astana mektebiniń Nomadic Dragons komandasy shırek fınalǵa shyǵyp, óz dıvızıonynda top 4 alıans qataryna engen jalǵyz qazaqstandyq komanda boldy.
Qazaqstan quramasynyń jetistikteri júıeli daıyndyq pen Qazaqstan Respýblıkasy Oqý aǵartý mınıstrligi, USTEM Foundation jáne «Daryn» respýblıkalyq ǵylymı praktıkalyq ortalyǵynyń qoldaýynyń nátıjesi. 2020 jyldan bastap Qazaqstan FIRST halyqaralyq qozǵalysynda óz pozıtsııasyn nyǵaıtyp keledi.
Budan buryn qazaqstandyq oqýshy Eýropalyq matematıkalyq olımpıadada top jarǵanyn jazǵan edik.
