Robototehnıka, ıntellekt jáne sport: «Aıbyn-2026» jıynynda baıqaý synaqtary bastaldy
ASTANA.KAZINFORM — Qorǵanys mınıstrliginiń Shoqan Ýálıhanov atyndaǵy áskerı kolledjiniń «Amandyq» polıgonynda ótip jatqan «Aıbyn-2026» XII halyqaralyq áskerı-patrıottyq jastar jıyny aıasyndaǵy jarystarǵa Qazaqstan, Ázerbaıjan, Qyrǵyzstan, Reseı jáne Ózbekstannan kelgen myńǵa jýyq ul-qyz qatysyp jatyr.
Jıynǵa qatysýshylar dalalyq lagerge beıimdelip, jarys sharttarymen tanysyp úlgerdi. Barlyǵy áskerı tártipke keltirilgen. Jas patrıottar kerneı únimen oıanyp, tańǵy dene shynyqtyrý jattyǵýlary jasaıdy. Odan soń tańǵy as iship, baıqaýlarǵa, qyzyqty kezdesýler men mádenı-demalys is-sharalaryna qatysady.
Jarystar shet memleketterdiń komandalary, óńirlerdegi áskerı-patrıottyq klýbtar, kúshtik qurylymdardyń komandalary jáne áskerı oqý oryndarynyń komandalary sekildi tórt sanat boıynsha uıymdastyrylǵan.
Smart Sarbaz baıqaýy aıasynda jas baǵdarlamashylar robototehnıka, aqparattyq tehnologııalar jáne ushqyshsyz júıeler salalary boıynsha avtorlyq jobalaryn usyndy. Mysaly, «Jas teńizshiler» komandasy tótenshe jaǵdaılar kezinde adamdardy qaýipsiz aımaqqa evakýatsııalaýǵa arnalǵan robottandyrylǵan tehnıkany tanystyrdy. Robot-evakýator salmaǵy 100 kelige deıingi zardap shekken adamdy kóterip, tasymaldaı alady. Sonymen birge adam ómirine qaýipti aımaqtarda barlaý júrgizýge jáne mınalardy izdeýge arnalǵan avtomattandyrylǵan keshender de qazylar alqasynyń erekshe qyzyǵýshylyǵyn týdyrdy.
«Aıbyn daryny» zııatkerlik oıynyna qatysýshylar da test tapsyrmalaryn, rebýstar men logıkalyq esepterdi sheshý barysynda ózderiniń bilimdiligi men tapqyrlyǵyn kórsete bildi.
Al uldar arasynda beltemirge tartylýda, sondaı-aq qyzdar arasynda shalqalaı jatyp deneni kóterý jattyǵýlaryn oryndaý kezinde tartysty ári qyzyqty básekelestik órbidi.
— «Aıbyn» jıynyna úshinshi ret qatysyp otyrmyn. Jyl saıyn aldyma saıysta eń joǵary nátıje kórsetý maqsatyn qoıamyn. Ótken jyly bul jattyǵýdy 67 ret oryndaǵan edim, al búgin óz kórsetkishimdi jańartyp otyrmyn. Shalqalaı jatyp, deneni kóterýdi 83 ret qaıtalap, jeke rekordymdy ornattym. Árıne, bul jetistiktiń artynda aılar boıy júrgizilgen tynymsyz jattyǵýlar, orasan zor eńbek pen temirdeı tártip jatyr. Tálimgerlerimniń úmitin aqtaǵanyma qýanyshtymyn, — dedi «Suńqar» áskerı-patrıottyq klýbynyń tárbıelenýshisi Nurdana Erǵazy.
«Aıbyn juldyzy» shyǵarmashylyq baıqaýynda elimizdiń ár óńirinen kelgen áskerı-patrıottyq klýbtardyń tárbıelenýshileri ózderiniń talanttary men qabiletterin pash etti.
Jarystar jalǵasýda. Alda jas patrıottarǵa tózimdiligin, tapqyrlyǵyn jáne komandamen jumys isteý qabiletin kórsetýge múmkindik beretin jańa synaqtar kútip tur.
Aıta ketelik Qazaqstanda «Aıbyn-2026» halyqaralyq áskerı-patrıottyq jıyny bastalǵan edi.
