Robot sot oryndaýshylar arqyly óndiriletin soma 40 AEK-ke kóteriledi

ASTANA. KAZINFORM – Ádilet mınıstri Erlan Sársembaev Úkimet otyrysynda sot sheshimin tsıfrlyq tehnologııalar arqyly oryndatý jumysynyń aıasy keńeıetinin aıtty. 

— Halyq tarapynan jıi syn aıtylatyn ózekti baǵyt — májbúrlep oryndatý máselesi. 2024 jyl ishinde 89 myń shaǵym kelip túsken. Bul rette jasandy ıntellekt múmkindikterin odan ári qoldanatyn bolamyz. Robot sot oryndaýshysy arqyly ońaılatylǵan is júrgizýdi odan ári damytý jalǵasady. Robot arqyly óndirip alý somasyn jıyrmadan qyryq aılyq eseptik kórsetkishke deıin (157 280 teńge) keńeıtýdi josparlap otyrmyz. Bul azamattardyń qarjysyn únemdeıdi.

«Tsıfrlyq assıstent» engize otyryp, «Óndirip alýshy men boryshkerdiń jeke kabınetin» jetildiremiz. Assıstent istiń oryndalý barysyn tolyq kórsetetin bolady. Atap aıtqanda, sot oryndaýshynyń qabyldaǵan jáne qabyldaýy tıis sharasyn kórsetedi, - dedi ol.

Aıtýynsha, endi halyq osy platforma arqyly sot oryndaýshynyń áreketine shaǵymdana alady. 

— Múlikke salynǵan tyıymdy, elden shyǵýǵa ýaqytsha shekteýdi alyp tastaý jáne boryshkerler tiziliminen shyǵarý máselesin avtomattandyrý arqyly sheshý josparlanýda, - dedi Erlan Sársembaev.

Buǵan deıin Pavlodarda robot sot oryndaýshysy boryshkerlerdiń 7,5 mln teńgesin únemdep qalǵany habarlanǵan edi.