Robot sot oryndaýshy 3 myńǵa jýyq aıyppul óndirdi

ASTANA. KAZINFORM – QR Ádilet mınıstrliginiń resmı ókili Talǵat Ýálı robot sot oryndaýshynyń jumysyna túsinik berdi.

Jyl basynda Taraz qalasynda 10 AEK-ke deıingi ákimshilik aıyppuldardy óndiretin «Robot» jeke sot oryndaýshysyn iske qosqan edi.

Osyǵan deıin azamattar salynǵan aıyppuldy ýaqytynda óteı almaǵan jaǵdaıda onyń 25%-ǵa deıingi somasyn jeke sot oryndaýshyǵa tóleýge mindetti bolatyn.

Endi bul qyzmetti robot tegin atqarady. 

Jańa jobanyń arqasynda el azamattary 2 mlrd teńgege deıin únemdeı alady.

«Bul jeke sot oryndaýshy qyzmetine aqy tóleý boıynsha azamattardyń qarjylyq júktemesine, sondaı-aq qaǵaz jetkizgishtegi qujattan jáne adamı faktordan tolyǵymen bas tartýǵa oń áser etedi. Qazirgi ýaqytta robot 2876 atqarýshylyq óndiris qozǵady, 4 278 876 teńge somasyna 226 óndiris tólendi», — dedi T. Ýálı mınıstrlik uıymdastyrǵan brıfıngte. 

Jaqyn arada pılottyq jobany respýblıkaǵa taratý josparlanyp otyr. 

Sonymen birge, mınıstrlik ádilet organdary salalaryn tsıfrlandyrý máselelerine erekshe nazar aýdarady.

Máselen, 29 aqpannan bastap Kaspi qosymshasynda qozǵalǵan atqarýshylyq is júrgizý týraly habarlama iske qosyldy.

Bıylǵy 4 naýryzdan bastap kommertsııalyq emes uıymdardy tirkeý jónindegi memlekettik qyzmet «Elektrondyq úkimet» portalynda qoljetimdi boldy.

Osylaısha, kommertsııalyq emes uıymdar endi eGov portaly arqyly memlekettik qyzmetti alýǵa ótinish beredi. 

«Ulttyq aqparattyq tehnologııalar» AQ jáne eGovMobile Business qosymshasynda zańdy tulǵalar úshin onlaın senimhat jobasyn iske asyryp jatyr.  

Osylaısha, zańdy tulǵa basshylary óz qyzmetkerine senimhatty elektrondy túrde bere alady.

Nátıjesinde osyndaı senimhattar «Tsıfrlyq qujattar» servısinde odan ári talap etý orny boıynsha usynylmaq.