Robo-kıiz úı, 360 gradýstyq sahna jáne LED-ekrandaǵy «Jeti qazyna»: Almatyda Naýryz erekshe ótedi

Jasyl qala Almatynyń kósheleri kóktem kele kórkeıe tústi. Ulttyq oıý-órnekpen, art-nysandarmen jáne erekshe ekspoztsııalarmen bezendirilgen shaharda merekelik kóńil-kúı seziledi. Naýryzǵa oraı, erteń Almatynyń barlyq 8 aýdanynda aýqymdy kontserttik baǵdarlamalar uıymdastyrylady. Odan bólek Astana alańy, Abaı alańy, Jibek joly dańǵylyna deıin Panfılov kóshesiniń boıy – ulttyq merekeni toılaýǵa qala halqyn jınaıtyn basty alańdarǵa aınalmaq. Qazir bul aýmaqtardyń birinde sahna qurylyp jatsa, endi birinde kontsertke qorytyndy daıyndyq jasalyp jatyr. 

21 naýryz saǵat 11:00-den 22:00-ge deıin Astana alańy ulttyq toıdyń oshaǵyna aınalady. Munda aýqymdy merekelik baǵdarlama ótedi, kórkem teatrlandyrylǵan qoıylym qoıylady. Alańnyń jan-jaǵy ınteraktıvti aımaqtar arqyly jandana túsedi. Osy maqsatta Abylaıhan dańǵylynan Nazarbaev kóshesine deıin Tóle bı kóshesi jabylyp, Qazaq-brıtan tehnıkalyq ýnıversıtetiniń aldynda jalpy kólemi 1000 sharshy metr bolatyn, 6 bólikten turatyn erekshe sahna qurylǵan.

Sondaı-aq Astana alańynda 6 taqyryptyq kıiz úı tigilip, almatylyqtardy qarsy alýǵa daıyn tur. Onyń ishinde «Uly dala áýeni» kıiz úıinde Abaı, Jambyl, Shákárim, Aqan seri, Birjan sal syndy tarıhı tulǵalardyń mýzykalyq aspaptary usynylady. Robo-kıiz úıde qonaqtar robototehnıka boıynsha jańashyl jobalarmen tanyssa, DIGITAL 360 kıiz úıinde qabyrǵa men edende ornatylǵan LED-ekrandardan JI kómegimen jasalǵan beınerolıkterdi tamashalaı alady. Odan bólek kelesi qazaqy úılerde Altyn adam men saq dáýiriniń jádigerleri, biz kıiz ónerimen jasalǵan týyndylar, tanymal almatylyq dızaınerlerdiń kıimderin kórsetilgen.

- Qazirgi ýaqytta búkil respýblıka boıynsha Ulystyń uly kúni — Naýryz meıramyn merekeleýge arnalǵan aýqymdy daıyndyq jumystary júrgizilip jatyr. Elimizdiń mádenı ortalyǵy Almatydaǵy daıyndyq ta qyzý. Merekeniń basty ortalyqtarynyń biri – Astana alańynda 6 taqyryptyq kıiz úı tigilgen. Olardyń árqaısysy qazaq halqynyń baı mádenıeti men tarıhyn jan-jaqty ashady, – dedi Almaty mýzeıiniń jetekshisi Kamshat Jıenalıeva.

Al almatylyqtar serýendeıtin súıikti aýmaqtardyń biri – Panfılov kóshesiniń boıy da (Qabanbaı batyr – Jibek joly) zamanaýı jáne dástúrli óner toǵysqan erekshe alańǵa aınalady. Qala turǵyndary men qonaqtary úshin túrli mazmundy belsendilikter uıymdastyrylady. Qazir munda qorapsha tárizdes LED-ekrandar qoıylǵan. Onda úsh tildegi jazýmen qazaqtyń jeti qazynasy kórsetilip tur. Mereke kúni Robo DJ-diń shoýy, arnaıy kontserttik baǵdarlama azamattardyń kóńil-kúıin kóteredi. Sondaı-aq 21-22 naýryz aralyǵynda Arbatta dástúrli «KitapFest-2026» kitap festıvali ótedi.

Naýryz meıramynyń baǵdarlamasy Abaı alańyn da qamtıdy. Munda 21 naýryz kúni saǵat 12:00-den 22:00-ge aýqymdy kontsert uıymdastyrylady. Bir ereksheligi – munda sahna 360 gradýs formatynda ornatylǵan. Sonymen qatar Abaı alańynda Túrkııa, Ázerbaıjan, Tájikstan, Ózbekstan, Qyrǵyzstan jáne otandyq qolónershilerdiń kórme-jármeńkesi bolady.

- Biz arnaıy shaqyrtýmen Ózbekstannan keldik. Qazaqstanda merekeniń osyndaı aýqymda atap ótilýi — úlken qýanysh. Bıyl Naýryz ben Ramazan aıtynyń tuspa-tus kelýi Ortalyq Azııa halyqtaryn odan saıyn biriktire túsetini anyq. Biz qazaq sheberlerimen óte tyǵyz baılanystamyz jáne únemi yntymaqtastyqta jumys isteımiz. Erteń qoldanbaly ónerdiń negizgi túrlerin usynamyz: Rıshtan ólkesiniń myń jyldyq tarıhy bar qysh buıymdary, ózbek halqynyń dástúrli kesteleý ónerimen tigilgen týyndylary, ulttyq kıimder bolady, – dedi ózbekstandyq qolónershi Álisher Nazırov.

Naýryzdy merekeleý aıasynda 21-23 naýryz aralyǵynda Almaty qalasy mýzeıler birlestigi men QR Ulttyq ortalyq mýzeıi metropolıten beketterinde fotokórme uıymdastyrady. Jolaýshylarǵa qazaq halqynyń dástúri men mádenıetin beıneleıtin fotosýretter usynylady.

Eske salaıyq, buǵan deıin Almatyda bir mezette 11 500 oqýshy kúı oryndap, rekordtar kitabyna endi.