Robert Pattınson jańa fılmde Djeıms Bondtyń rólin somdaıdy
ASTANA. KAZINFORM — Amazon-MGM kompanııasy Djeıms Bond týraly jańa fılmde 007 agentiniń rólin brıtandyq akter Robert Pattınson somdaıtynyn jarııalady. Bul týraly BBC habarlaıdy.
Pattınson «Betmen» jáne «Odısseıa» sııaqty fılmderdegi rólderi arqyly tanymal.
40 jastaǵy akter álemdik kınodaǵy eń áıgili barlaýshynyń róline úmitker bolǵan basqa akterlerdiń keıbirinen jasy úlken. Basylymnyń jazýynsha, Pattınsonnyń keńinen tanymal bolýy Amazon-MGM úshin mańyzdy faktor bolǵan.
Sarapshylardyń pikirinshe, bul fılmniń bolashaqtaǵy kassalyq tabysyna da áser etýi múmkin.
Robert Pattınson Londonda dúnıege kelgen. Onyń alǵashqy iri róli — 2005 jyly jaryq kórgen «Garrı Potter jáne Ot kýbogy» fılmindegi Sedrık Dıggorı beınesi (Harry Potter and the Goblet of Fire).
Keıin ol Krıstofer Nolannyń «Dovod» (Tenet) fantastıkalyq fılminde oınady. Sondaı-aq 2022 jyly rejısser Mett Rıvz túsirgen «Betmen» fılminde basty róldi somdady.
Bıyl akter Nolannyń «Odısseıa» fılmindegi negizgi juldyzdardyń birine aınaldy. Bul týyndy sońǵy ýaqyttaǵy eń kóp nazar aýdarǵan kıno jobalardyń qataryna jatady. Fılmde Pattınson Odısseıdiń basty qarsylasy Antınoıdyń rólin somdady.
— 2025 jylǵy aqpanda uzaq jyldar boıy Djeıms Bond týraly fılmderdi prodıýserlik etken Barbara Brokkolı men Maıkl Ýılson franshızany shyǵarmashylyq turǵydan basqarý quqyǵyn Amazon MGM Studios kompanııasyna berdi. Bul stýdııa 2022 jyly tehnologııalyq alpaýyt Amazon MGM kınostýdııasyn satyp alǵannan keıin qurylǵan, — delingen habarlamada.
Buǵan deıin aty ańyzǵa aınalǵan akter Djekı Chan Mańǵystaý óńirine taban tiregenin jazǵan edik.