Robert Kennedı saılaýdan bas tartyp, Trampqa daýys berýge shaqyrdy

ASTANA. KAZINFORM — AQSh prezıdenttigine táýelsiz kandıdat Robert Kennedı óziniń saılaý naýqanyn toqtatyp, respýblıkalyq partııanyń kandıdaty Donald Trampty qoldaıtynyn málimdedi. Ol Trampty qoldaý týraly sheshim otbasynda shıelenis týǵyzǵanyn moıyndady, dep jazady Euronews.

Juma kúni sóılegen sózinde Kennedı áli bir sheshimge kelmegen shtattarda bıýlletennen óz esimin alyp tastaýǵa tyrysatynyn aıtty, óıtkeni onyń saılaýǵa qatysýy demokrattar kandıdaty Kamala Harrıske kómektesedi dep sanaıdy.

«Birneshe aı buryn amerıkalyqtarǵa „eger spoıler bolsam, básekeden shyǵamyn“ dep ýáde berdim. Spoıler — saılaýdyń nátıjesin ózgerte alatyn, biraq jeńiske jetý múmkindigi joq adam. Maǵan maza bermegen buqaralyq aqparat quraldarynyń úzdiksiz, júıeli tsenzýrasynyń arqasynda saılaýda jeńiske jetýdiń naqty joly bar ekenine endi senbeımin», — dedi ol. 

Kishi Kennedı óz jaqtastary ony kóptegen shtattarda qoldaı alatynyna senimdi. 

Apta sońynda ol Arızona men Pensılvanııadaǵy kandıdatýrasyn alyp tastap, bul qadam Tramppen sóıleskennen keıin jasalǵanyn túsindirdi. Kennedı jýrnalısterge qazir «prezıdent Trampty qoldaıtynyn» málimdedi.

Kishi Kennedı — bas prokýror jáne senator Robert Kennedıdiń uly jáne Demokrattar partııasynda erekshe oryn alatyn prezıdent, qastandyqpen óltirilgen Djon Kennedıdiń nemere inisi.

Ol Trampty qoldaý týraly aıtqan sózderinen keıin týystarymen arada túsinbeýshilik týǵanyn moıyndady.

Juma kúni Kennedı otbasynyń bes múshesi onyń Trampty qoldaýyn «qaıǵyly oqıǵanyń qaıǵyly aıaqtalýy» dep atady jáne ózderi Kamala Harrıske daýys beretinin rastady.

Las-Vegastaǵy saılaý naýqanynda sóz sóılegen kandıdat Donald Tramp Kennedıdiń qoldaýyna ıe bolý «úlken mártebe» ekenin jetkizdi. 

«Bobbıge alǵys aıtqym keledi, bul óte jaqsy. Bul shynymen de keremet. Men úshin úlken mártebe. Ol — eldiń qurmetine bólengen tamasha jigit», — dedi Tramp.

Naýqannyń sońǵy aptalarynda kishi Kennedı men Tramp bir-birine birneshe ret maqtaý aıtty. Olardyń saılaý shtabtary birneshe aı boıy demokrattardy quqyqtyq júıeni óz paıdasyna paıdalandy dep aıyptap, Harrıstiń múmkindikterin shekteý maqsatynda kúsh biriktire alatynyn ashyq aıtty.

AQSh prezıdent saılaýy 5 qarashada ótedi.

When a U.S. president colludes with, or outright coerces, media companies to censor political speech, it's an attack on our most sacred right of free expression. pic.twitter.com/yzZg1KfAXA

— Robert F. Kennedy Jr (@RobertKennedyJr) August 24, 2024