Robert Fıtso Qazaqstan Prezıdentin Slovakııaǵa saparmen kelýge shaqyrdy
ASTANA. KAZINFORM – Slovakııa Premer-mınıstri Robert Fıtso Memleket basshysy Qasym-Jomart Toqaevty eline saparmen kelýge shaqyrdy.
- Bul Sizdiń elińizge alǵashqy saparym. Ókinishke qaraı, burynyraq Sizdiń elińizge kele almadym. Degenmen búgin osy jerde bolǵanyma qýanyshtymyn. Rasynda da elderimiz úshin óte mańyzdy taqyryptarǵa qatysty kelissóz júrgizdik. Jańa, ádil jáne ashyq Qazaqstan qurý jolyndaǵy órshil maqsattaryńyzdy, elińiz úshin istep jatqan qyzmetińizdi zor qurmetpen baǵalaımyz. Bul josparlaryńyz júzege asyrylyp ta jatyr, - dedi mártebeli meıman Aqordada ótip jatqan keńeıtilgen quramdaǵy kelissóz barysynda.
Sonymen qatar ol Qazaqstan Prezıdentin Slovakııaǵa saparmen kelýge shaqyrdy.
- Prezıdent myrza, men Peter Pellegrınıdiń (Slovakııa Prezıdenti) Slovakııaǵa saparmen kelý shaqyrýyn qaıtalaǵym kelip otyr. Sizdiń kún tártibińiz óte qaýyrt ekenin bilemin. Sizdiń Cheh Respýblıkasyna saparmen barý josparyńyzǵa qatysty aqparatym bar. Eger Sizde qandaı da bir múmkindik bolsa, onda saparyńyzdy biriktirip, Slovakııaǵa da kelseńiz, - dedi Robert Fıtso.
Buǵan deıin Memleket basshysy Qasym-Jomart Toqaev Slovakııa Premer-mınıstri Robert Fıtsomen shaǵyn quramda kelissóz júrgizgenin jazǵan edik.
Al keńeıtilgen quramdaǵy kelissóz barysynda Memleket basshysy Slovakııa Qazaqstannyń Eýropalyq odaqtaǵy mańyzdy ári senimdi seriktesi ekenin aıtty.