Rızabek Aıtmuqan Azııa chempıonatynda kúmis aldy

ASTANA. KAZINFORM - Qyrǵyzstan astanasy Bishkek qalasynda búgin, 11 sáýirde jalaýyn kótergen Azııa chempıonatynda erkin kúresten Rızabek Aıtmuqan (97 keli) kúmis medal aldy.

Qazaqstandyq balýan fınalda bahreındik Ahmed Tajýdınovpen kúsh synasty. Qarsylas ońaı bolǵan joq. Reseıde dúnıege 21-jastaǵy balýan 2022 jyldan beri Bahreın eliniń atynan synǵa túsip keledi. 2023 jyly 97 kelide álem chempıony ataǵyn jeńip alsa, Hanchjoýda ótken Azııa oıyndary jáne Azııa chempıonatynda altyn medal ıegeri atandy.

Al Rızabek Aıtmuqan byltyr álem chempıonatynda 92 keli salmaqta jeńis tuǵyrynan kórinse, Azııa chempıonatynda kúmiske qol jetkizdi.

Qos álem chempıony arasyndaǵy taıtalas alǵashqy mınýttan belsendi bastaldy. Upaı qoryn molaıtýǵa tyrysqan balýandar óz ádisin jasaýǵa tyrysty. Birinshi kezeńde esep 1:1 esebimen teń aıaqtaldy.

Ekinshi kezeńde bahreındik balýan alǵashqy mınýttarda eki upaı alyp ketti. Odan keıin balýandar bir-birden upaıǵa ıe boldy.

Osylaısha Rızabek Aıtmuqan qarsylasyna 2:4 esebimen jeńilip, Azııa birinshiliginiń kúmis júldegeri atandy.

Qazirge deıin 57 kelide baq synaıtyn taǵy bir balýanymyz Meırambek Qartbaı qola júlde aldy.

Sondaı-aq, el quramasynan Azamat Ómirjanov (79 keli) qola júlde úshin talas Asomıddın Hasanovqa ese jiberdi.