Rızabek Aıtmuqan álem chempıonatyn sátti bastady
ASTANA. KAZINFORM - Albanııa astanasy Tırana qalasynda ótip jatqan 23 jasqa deıingi jastar arasyndaǵy álem chempıonatynda erkin kúres sheberi Rızabek Aıtmuqan (97 keli) shırek fınalǵa shyqty.
Alǵashqy beldesýinde qazaqstandyq balýan kanadalyq Ýılıam Noksti jeńdi.
Endi ol shırek fınalda polshalyq Vladıslav Kozlovpen kezdesedi.
Aıta ketsek, Rızabek qyrkúıek aıynda Ispanııanyń Pontevedre qalasynda kúres túrlerinen 20 jasqa deıingi sportshylar arasynda álem chempıony atandy.
Ótken jyly qazaqstandyq balýan Serbııa astanasy Belgrad qalasynda bolǵan eresekter arasyndaǵy álem chempıonatynda jeńis tuǵyryna kóterildi.
1990 jyldan beri ol álem chempıonatynda erkin kúresten altyn alǵan tuńǵysh ári eń jas qazaqstandyq palýan atandy. Oǵan deıin ulttyq qurama 17 júldege qol jetkizgen. Onyń 5-ýi kúmis, 12-si qola medal bolatyn.
Rızabek Aıtmuqan 2004 jyly Soltústik Qazaqstan oblysynda dúnıege kelgen.
