Rızabek Aıtmuhannyń álem chempıonatynda alǵan jaraqatyna qatysty tyń derek shyqty
ASTANA. KAZINFORM — Qazaqstan tarıhyndaǵy erkin kúresten tuńǵysh álem chempıony Rızabek Aıtmuhan tize býynyna ota jasatty.
Sportshy jaraqatty Astanada ótken kúresten álem chempıonaty kezinde alǵan. Elordanyń «Barys Arena» sport keshenindegi bozkilemge Rızabek 97 kelige deıingi salmaq dárejesinde basty favorıtterdiń biri retinde shyqqan edi.
Alaıda jarys joly sátsiz aıaqtaldy. Alǵashqy irikteý beldesýinde ol Reseıdiń eki dúrkin Olımpıada chempıony, aty ańyzǵa aınalǵan Abdýlrashıd Sadýlaevtan jeńilip qaldy. Keıin belgili bolǵandaı, dál osy beldesý kezinde balýan aıaǵyn jaraqattap alǵan.
Tekserý nátıjesinde sportshyǵa ota jasaý qajet ekeni anyqtalǵan. Reseılik dáriger Ondar Artyshtyń Instagram paraqshasynda Rızabektiń ota aldyndaǵy jáne ota kezindegi jaǵdaıy kórsetilgen vıdeo jarııalandy. Jazbada geolokatsııa retinde Astana qalasy kórsetilgen.
— Búgin biz Rızabekke ota jasaımyz. Ol alǵashqy beldesýi kezinde-aq kúres barysynda tize býynynan aýyrsyný sezingen. MRT nátıjesin qarap shyqtyq, ota jasaýǵa kórsetilim bar. Bizden kómek surady. Sálden keıin operatsııalyq bólmege kiremiz, — dedi sportshyǵa ota jasaǵan belgili reseılik hırýrg Ondar Artysh.
Endi qazaqstandyq tanymal balýandy uzaq ońaltý jáne qalpyna kelý kezeńi kútip tur. Ol bozkilemge oralý úshin em-dom qabyldaıdy.
Eske salaıyq, buǵan deıin qazaqstandyq balýan Rızabek Aıtmuhan Astanada ótip jatqan kúresten álem chempıonatyndaǵy alǵashqy beldesýinde jeńilip qalǵanyn jazǵanbyz.
