«Rixos» qonaq úıinde 100 adam jınalǵan úılený toıy ótken
NUR-SULTAN. QazAqparat – Demalys kúnderi Nur-Sultan qalasynyń polıtseıleri 34 karantın rejımin buzý faktisin anyqtady, dep habarlaıdy QazAqparat elordalyq polıtsııa departamentiniń baspasóz qyzmetine silteme jasap.
Demalys kúnderi polıtsııa qyzmetkerleri úılený toıyn ótkizgen meıramhanalardy anyqtady. Bul toılarda meıman sany kóp bolǵan, olardyń arasynda qarttar men balalar da bar. Mysaly, keshe «Gaýhartas» meıramhanasynyń banket zalynda 150 adamǵa arnalǵan toı anyqtaldy. Zalda merekelik dastarhan jaıylyp, qonaqtar jaıǵasqan. Sondaı-aq polıtseıler «Rixos President Astana» qonaqúıine kelgen kezde munda 100-den astam adam jınalǵan úılený toıy ótip jatqan. «Alýa» meıramhanasynda ótken qyz uzatýǵa da karantın rejımi kedergi bolmaǵan. Polıtseıler meıramhanada 100-ge jýyq qonaq bolǵanyn anyqtaǵan.
Úılený toıymen qatar, azamattar qaýipsizdik sharalaryn elemeı, kóp adam shaqyryp as beredi. «Tólep» meıramhanasynda áleýmettik qashyqtyqty saqtamaǵan 50-den astam adam asqa jınalǵan. Barlyq zań buzý faktisine qatysty materıal QR ÁQBK 425-baby boıynsha jaýapkershilikke tartý úshin Nur-Sultan qalasynyń Taýarlar men kórsetiletin qyzmetterdiń sapasy men qaýipsizdigin baqylaý basqarmasyna joldandy.
Jedel top demalys kúnderi 623 kásipkerlik nysanyn tekserip, 34 karantın rejımin buzý faktisin anyqtady.
