River Park úılerine jylý berýde aqaý shyqty: Almaty ákimdigi túsinik berdi
Almatynyń Medeý aýdanynda ornalasqan River Park turǵyn úı keshenderine jylý berýdiń nasharlaýy qurylys salýshynyń kásibılikke jatpaıtyn is-áreketinen bolǵan. Bul týraly qala ákimdiginiń baspasóz qyzmetinen málim etti, dep habarlaıdy Kazinform.
River Park turǵyn úı keshenine jylý berýde aqaý shyqty: almaty ákimdigi túsinik berdi
«Almaty jylý jelileri» JShS málimetine súıensek, atalǵan turǵyn úı kesheniniń ǵımarattaryna beriletin jylý parametrleriniń tómendeýi — jeke qurylys mekemesine tıesili avtomattandyrylǵan jylý pýnktiniń (AJP) durys jumys istemeýinen.
Bul rette, kommýnaldyq qyzmet ókilderi jylý óndirý kózinen («Almaty elektr stansalary» AQ, JEO-nyń jylýmen jabdyqtaý aımaǵy) atalǵan turǵyn úı keshenine jylý barlyq parametr saqtala otyryp, shtattyq rejımde berilip otyrǵanyn aıtýda. Olardyń málimetinshe, syrtqy aýa temperatýrasy tómen bolǵan kúnderi bul turǵyn úı kesheniniń turǵyndarynan eshbir shaǵym túspegen.
River Park TK úılerindegi jylytýǵa qatysty shtattan tys jaǵdaı turǵyn úı keshenine qyzmet kórsetetin jeke servıstik uıymnyń avtomattandyrylǵan jylý pýnktiniń (AJP) aralasýynan týyndaǵan bolýy yqtımal», — delingen ákimdiktiń baspasóz qyzmeti usynǵan aqparatta.
Qurylysshylarǵa kómekke Almaty jylý jelileriniń kezekshi brıgadasy jiberilgen.
«Onymen qosa, buǵan deıin Medeý aýdanynyń ákimdigi turǵyn úılerge jylý berýdi qalpyna keltirý boıynsha shuǵyl sharalardy qabyldaý úshin qurylys salýshy «ART Medıa» JShS ókilderimen kelissóz júrgizgen bolatyn. Qurylys salýshy mekeme elevatorly torap úshin qosymsha nasostar satyp alynatynyn ýáde etti. Nasostar kelesi aptada ornatylmaq. River Park turǵyn úı keshenderin jylýmen jabdyqtaý máselesi Almaty ákimdigi men qalanyń barlyq tıisti shuǵyl qyzmetteriniń baqylaýyna alyndy», — dep habarlady Almaty ákimdiginiń baspasóz qyzmetinen.
