Rıodaǵy daýdan keıin demeýshiler amerıkalyq júzýshi Lohtemen kelisimsharttaryn úzdi
ASTANA. QazAqparat - Raıan Lohte óziniń Speedo-men kelisimsharty buzylǵanyn jáne bul sheshimdi qurmetteıtinin aıtty, dep jazady Bı-bı-sı.
Tórt amerıkalyq kompanııa Rıo-de-Janeırodaǵy Olımpıada oıyndarynda basy daýǵa ilikken AQSh-tyń Olımpıada chempıony Raıan Lohtemen aradaǵy demeýshilik kelisimshartty buzý týraly sheshim qabyldaǵan. Olar - Speedo USA (júzýge arnalǵan kıim men jabdyqtar óndiredi), Ralph Lauren sándi markasy, Syneron-Candela kosmetıkalyq kompanııasy jáne matras óndiretin Airweave Lcc kompanııasy.
Rıoda Lohte men onyń dostary ózderin polıtsııamyz dep tanystyrǵan bireýler tonap ketti dep habarlaǵan edi, keıinnen onyń ótirik ekeni anyqtaldy. Muny estigen kompanııalar dereý chempıonmen kelisimshartty buzatyndaryn jarııalady.
«Biz óz brendimizdiń qundylyqtaryna qaıshy keletin bul qylyqpen kelise almaımyz», - delingen Speedo málimdemesinde.
14 tamyzda Lohte jáne taǵy úsh amerıkalyq júzýshi Rıodaǵy benzın kolonkasyndaǵy dárethana esigin syndyrǵan. Olar qaladaǵy saýyq keshinen Olımpıada qalashyǵyna qaıtyp kele jatqan.
