Rıodaǵy Olımpıadalyq stadıonda órt shyqty, qazaqstandyq sportshylar aman
ASTANA. KAZINFORM – Brazılııanyń Rıo-de-Janeıro qalasyndaǵy Olımpıadalyq stadıonda órt shyqty. Bul týraly Halyqaralyq semserlesý federatsııasy habarlady.
Órt velodromnyń shatyr bóliginde tutanǵan. 1 sáýirden bastap atalǵan nysanda jasóspirimder men kadetter arasyndaǵy semserlesýden álem chempıonatynyń aldyn ala kezdesýleri ótip jatqan. Oqıǵa kezinde alańda eshkim bolmaǵan, zardap shekkender joq.
— Jergilikti bılik ókilderi de zardap shekkender joq ekenin rastady. Semserlesý jarystary velodromda jáne negizgi alań — Arena Carioca 1 kesheninde ótip jatqan. Qazirgi ýaqytta barlyq jarystar velodromnan qaýipsiz qashyqtyqta ornalasqan nysanda jalǵasyp jatyr, — delingen halyqaralyq federatsııa taratqan aqparatta.
Sonymen qatar atalǵan jarysta Qazaqstan atynan 17 semserlesýshi óner kórsetip jatyr.
— Bizdiń sportshylardyń eshqaısysy zardap shekken joq, — dep habarlady Ulttyq semserlesý federatsııasy.
Eske sala keteıik, Aqtóbede oblys ákimdiginiń ǵımaraty órtengen edi.
Aıta keteıik, 1 sáýirde Brazılııanyń Rıo-de-Janeıro qalasynda jasóspirimder men kadetter arasynda semserlesýden álem chempıonaty bastalady.
