Rıoda reseılik dıplomattyń tonaýshyny óltirgeni týraly aqparatty RF Bas konsýly joqqa shyǵardy
ASTANA. QazAqparat - Rıo-de-Janeırodaǵy RF-nyń Bas konsýly Vladımır Tokmakov «reseılik dıplomat tonaýshyny atyp óltirdi» degen aqparatty joqqa shyǵardy. Buǵan deıin sheteldik BAQ-ta brazılııalyq qorǵaýshy, Rıo-de-Janeırodaǵy Reseı konsýlynyń orynbasary Markos Sezar Feres Bragaǵa shabýyl jasalǵany týraly aqparat paıda bolǵan edi. Bul týraly newsru.com habarlaıdy.
«Bul brazılııalyq azamat dıplomatııalyq mekemeniń qyzmetkeri emes jáne Reseıdiń sheteldik mekemelerine esh qatysy joq», - dedi Tokmakov.
«Rıo-de-Janeırodaǵy barlyq reseılik dıplomattar jáne sheteldegi reseılik mekemelerdiń qyzmetkerleri din aman jáne bul oqıǵamen eshqandaı baılanysy joq. Oqıǵaǵa qatysy bar adam ózin «bas konsýldyqtyń qyzmetkerimin» dep tanystyrýy múmkin», - dedi Tokmakov.
Oqıǵa qalanyń batys bóliginde ornalasqan Outback meıramhanasy mańynda túski ýaqytta bolǵan. Aldyn ala málimetter boıynsha, óziniń BMW X5 kóliginde otyrǵan brazılııalyq advokatqa tonaýshylar mototsıklmen jaqyndaǵan. Olar kólik terezesin syndyryp, kóliktegiden qolyndaǵy saǵatty berýdi talap etip, qarýmen qorqytqan. Alaıda advokat olarmen aıqasyp qaskóıdiń qolynan qarýyn alyp ózin atyp óltirgen.
