Rıoda boksshylarymyz kem degende London Olımpıadasyndaǵy nátıjeni qaıtalaýy kerek - S. Qonaqbaev
ALMATY. QazAqparat- Bıyl Brazılııanyń Rıo-de-Janeıro qalasynda ótetin XXXI jazǵy Olımpıada barysynda boksshylarymyz kem degende 2012 jylǵy London Olımpıadasyndaǵy nátıjeni qaıtalaýy kerek. Bul týraly búgin Almaty oblysynyń Talǵar aýdanynda ornalasqan Búkilálemdik boks akademııasynda «Arýana» kópatqarymdyq saýyqtyrý ortalyǵynyń ashylý rásimi barysynda Halyqaralyq áýesqoı boks (AIBA) qaýymdastyǵynyń vıtse-prezıdenti, Azııa boks konfederatsııasynyń prezıdenti, AIBA-nyń sportshylar jáne jastar jónindegi komıssııasynyń tóraǵasy Serik Qonaqbaev málim etti.
«Búgingi tańda boks búkil álem boıynsha jańa deńgeıge kóterildi. Ár elderden myqty boksshylar shyǵyp jatyr. Sol sebepti boksshylar arasynda básekelestik arta tústi. Buǵan ulttyq qurama komandamyzdyń 2015 jyly Doha qalasynda ótken Álem birinshiligindegi sátsiz óneri kýá. Bul jaǵdaı bizdiń bapkerlerdiń aldyna jańa talaptar qoıdy. Boksshylardyń fızıkalyq jáne psıhologııalyq daıarlyqtaryna ózgerister engizildi. Sondyqtan, endi bıylǵy Rıo-2016 jazǵy Olımpıadasynan da medalsiz qaıtpaımyz degen úmittemiz. Bul jerde meniń jeke pikirim - kem degende 2012 jylǵy London Olımpıadasyndaǵy nátıjeni qaıtalaýymyz qajet», - dedi S. Qonaqbaev.
Sonymen qatar, ol jazǵy Olımpıada oıyndaryna kásipqoı boksshylardyń qatysý múmkindigi týraly da óz oıyn bildirdi.
«Bul másele ázirge tolyq sheshimin tapqan joq. Tek teorııa júzinde qaralyp jatyr. Qashan iske qosylatyny belgisiz. Bul jerde árıne Halyqaralyq Olımpıada Komıtetiniń resmı ruqsaty kerek. Onyń ústine bul óte shetin másele. Nege deseńiz, áýesqoı boksshylar men kásipqoı boksshylardyń jarystarǵa daıyndalý jáne qatysý úderisi árqalaı. Mysaly, kásipqoı boksshylar bir boks keshinde 12 raýndtyq saıysqa qatysqan soń, 3-4 aı úzilis alady. Al Olımpıada kezinde kem degende bes saıys ótkizýiń qajet. Sondyqtan, bul másele boıynsha da bapkerler men basqa da mamandardyń naqty pikirleri óte qajet», - dedi S. Qonaqbaev.
Aıta ketelik, 2012 jylǵy London Olımpıadasynda bokstan Qazaqstan ulttyq qurama komandasy 1 altyn, 1 kúmis jáne 2 qola medalge qol jetkizgen bolatyn. Onyń ústine London Olımpıadasynyń chempıony Serik Sápıev (69 keli) tehnıkalyq sheberligi óte joǵary boksshy retinde Vel Barker Kýbogyna ıe bolǵan edi.
Aıtpaqshy, Qazaqstan Vel Barker Kýbogyna ıelený jaǵynan AQSh-tan keıin ekinshi orynda keledi. Buǵan deıin bul kýbokty 1996 jylǵy Atlanta Olımpıadasynda 81 keli salmaq dárejesinde óner kórsetip, chempıon atanǵan Vasılıı Jırov pen 2004 jyly Afına Olımpıadasynda 69 keli salmaq dárejesinde óner kórsetip, altynnan alqa taqqan Baqtııar Artaev ıelengen bolatyn. Al AQSh boksshylary bul kýbokty 5 ret alǵan.
Al, 2015 jyly Katar eliniń astanasy - Doha qalasynda ótken Álem birinshiligende bokstan Qazaqstan qurama komandasy bar bolǵany 2 kúmis medalge ǵana qol jetkizgen bolatyn.
