Rıo úmitteri: Gúzel Manıýrova Olımpıada altynyna qol jetkize ala ma?

Biz búgin osy synda el namysyn qorǵaıtyn balýan qyzdarymyz arasyndaǵy sońǵy balýanymyzdyń kim ekenin nazarlaryńyzǵa usynyp otyrmyz.

Osyǵan deıin habarlaǵanymyzdaı, Rıo Olımpıadasyna áıelder kúresinen tórt balýan qyzymyz Juldyz Eshimova (48 keli), Ekaterına Larıonova (63 keli), Elmıra Syzdyqova (69 keli), Gúzel Manıýrova (75 keli) joldama jeńip alǵany jaıynda, olardyń kimder ekenin jeke-jeke tanystyryp óttik.

Búgin Gúzel Manıýrovaǵa da (75 keli) kezek kelip jetti.

Gúzel  Manıýrova

Týǵan kúni:

24 qańtar 1978 jyly týǵan

Týǵan jeri:

Reseı

Salmaq sanaty:

75 keli

Jattyqtyrýshy:

Ý. Y. Ýmarov

Azııa chempıony (2010, 2011, 2012), Golden Gran-prı ІІ oryn (2010), Jazǵy Azııa Oıyndarynda ІІІ oryn (2010), Jazǵy Olımpıada Oıyndarynda ІІІ oryn (2012), álem chempıonatynda ІІ oryn (2012).

Gúzel Manıýrovanyń balalyq shaǵy Qazaqstanda, Baıqońyr aılaǵynyń Lenınsk-5 jabyq qalashyǵynda ótken.

Kóp uzamaı onyń ata-anasy Máskeýge qonys aýdardy. 2010 jylǵa deıin qyzdyń sporttyq mansaby Reseımen baılanysty boldy. Mektepti aıaqtaǵannan keıin Gúzel Skrıabın atyndaǵy Máskeý veterınarlyq akademııasyna oqýǵa túsip, kúndizgi bólimde alty jyl bilim aldy. Biraq sportqa degen yntasynyń arqasynda Gúzel joǵary synyptarda aıkıdomen aınalysa bastady. Al 17 jasynda qara belbeýge qol jetkizip, jattyqtyrýshylyq qyzmetpen aınalysýǵa ruqsat aldy.

Aıkıdo kúresimen aınalysyp júrgende Gúzeldiń jetistikteri órge domalap, nátıjesinde aıkıdonyń úshinshi Aıkıkaı danyna qol jetkizdi. Biraq 2002 jyly onyń erkin kúreske yqylasy aýyp, osy jekpe-jektiń jattyqtyrýshylary S. Masıanov men A.Kolyvanovtyń qamqorlyǵyna ótti.

Tájirıbeli mamandar talantty qyzdy jazbaı tanyp, nátıjesinde 2004 jyly ol erkin kúresten Eýropa chempıonatynda jeńiske jetti.

Sondaı-aq, Afıny Olımpıadasynyń kúmis medalyn ıemdendi. 2005 jáne 2007 jyldary Gúzel eki ret Reseıdiń chempıony ataǵyna qol jetkizdi.

2008 jyly Beıjiń Olımpıadasyna Gúzel Manıýrova qatysa almady. Araǵa eki jyl salyp Gúzel Qazaqstanǵa qonys aýdaryp, azamattyǵyn ózgertti. Sol ýaqyttan bastap qazaqstandyq sporttaǵy jarqyn sátteri bastaldy. Ózi bizdiń otandyq tilshilerge bergen bir suhbatynda «Osyndaı sheshimdi qabyldaǵanyma sheksiz rızamyn! Qazaqstan maǵan ekinshi sporttyq ómir syılady. Osy elde meniń mansabymnyń jarqyn belesteri bastaldy. Men bul elge qaryzdarmyn», degen bolatyn. Talantty sportshynyń kelýi quramaǵa jańa serpin berdi. Ol úsh ret, 2010, 2011 jáne 2012 jyldary Azııa chempıonatyn jeńip aldy.

2011 jyly Stambýlda ótken álem chempıonatynda Gúzel besinshi orynǵa jaıǵasyp, 2012 jyly Londonda ótetin Olımpıadalyq oıyndarǵa joldama aldy. Sóıtip, Ulybrıtanııa astanasynda sportshy qyz jeńis tuǵyrynyń tómengi satysyna jaıǵasyp, Qazaqstan qorjynyna qola medal saldy.

Elge oralǵanda ony tosynsyı - áıelder quramasynyń aǵa jattyqtyrýshysy laýazymy kútip turdy.

Osydan keıin Gúzel Qazaqstannyń áıelder quramasynyń jattyqtyrýshylar shtabyn basqardy. Osy qurmetti laýazymdy basqara júrip, ózi de balýandarmen birge boz kilemniń kórigin qyzdyryp júrdi.  Sonymen, Rıo Olımpıadasyna da joldama jeńip aldy. Endi ol Rıoda baıraǵymyzdy taǵy bir márte jelbiretýge saqadaı saı.