Rıo olımpıadasyna OQO-dan 21 sportshy bara jatyr
ASTANA. QazAqparat - Bıyl Rıo olımpıadasyna Ońtústik Qazaqstan oblysynan 21 sportshy joldama jeńip alǵan. Bul týraly OQO Aımaqtyq kommýnıkatsııalar qyzmetinde ótken brıfıngte oblystyq Dene shynyqtyrý jáne sport basqarmasynyń basshysy Álibek Nurtaev málimdedi.
Onyń aıtýynsha, Rıo-de-Janeıro (Brazılııa) qalasynda ótetin XXXI jazǵy Olımpıada oıyndaryna oblystan 21 sportshy, sporttyń 11 túrinen qatyspaq. Tórt jylda bir keletin Olımpıada oıyndarynda sportshylarymyz oq atý, boks, baıdarka jáne kanoeda esý, aýyr atletıka, jeńil atletıka, dzıýdo, batýtta sekirý, stend atý, sadaq atý, kórkem gımnastıka men júzý syndy sporttyń túrlerinen el namysyn qorǵaıtyn bolady.
Bul sporttyq jarysqa qatysýǵa elimizden 103 sportshy joldama jeńip alǵan bolsa, onyń 5/1 bóligi ońtústikqazaqstandyq sportshylardyń enshisinde.
Sondaı-aq, baspasóz máslıhatyna QR bokstan ulttyq qurama komandasynyń bas bapkeri Myrzaǵalı Aıtjanov pen boksshylar Birjan Jaqypov jáne Qaırat Eralıev qatysty.
Brıfıngte sóz alǵan M.Aıtjanov sportshylarymyzdyń jattyǵýyna barlyq jaǵdaılar jasalǵandyǵyn aıtyp, búginde boksshylarymyz óz babynda ekenin jetkizdi.
Qazirgi tańda oblysymyzdyń eń tańdaýly degen sportshylary Olımpıadanyń joldamasyn jeńip alyp otyr. Jeńis tuǵyrynan kórinetindikterine senim bildirgen basqarma basshysy, barlyq sportshylarǵa sáttilik tiledi.
Esterińizge sala keteıik, 2016 jylǵy jazǵy Olımpıada oıyndary 5-21 tamyz aralyǵynda Brazılııanyń Rıo-de-Janeıro qalasynda ótedi.
