Rıo Olımpıadasyna baratyn qazaqstandyqtar vızany jeńil tártippen alady
ASTANA. QazAqparat - Rıo Olımpıadasyna baratyn qazaqstandyqtar úshin arnaıy vıza rejımi qarastyrylyp otyr. Qazaqstan Brazılııa elshiligimen osyndaı kelisimge kelgen. Bul týraly búgin halyqqa esep bergen QR Syrtqy ister mınıstri Erlan Ydyrysov málim etti.
«Ishki máselelerine baılanysty Brazılııa Parlamenti bir jarym jyl buryn qol qoıylǵan kelisimdi ratıfıkatsııalaı almady. ıAǵnı, Brazılııamen vızasyz rejım problemasy týyndady. Sondyqtan, bizdiń azamattardyń jaǵdaıyn oılastyra otyra, Olımpıadaǵa baratyn qazaqstandyqtar úshin arnaıy rejım engizý boıynsha kelisimge keldik»,-degen E.Ydyrysov Qazaqstannyń konsýldary taratatyn aqparatty baqylap otyrýǵa keńes berdi.
Mınıstr naqtylaǵandaı, Brazılııa elshiligimen jasalǵan kelisim aıasynda Qazaqstan azamattary vızany jeńildetilgen tártippen alady.
«Bılet bolsa, esh qıyndyqsyz vıza beriledi. Brazılııa elshiliginiń saıtynda bul tártippen tanysa alasyzdar», - dep tolyqtyrdy mınıstr.
Aıta keteıik, 5-21 tamyz aralyǵynda Rıo-de-Janeıro qalasynda kezekti jazǵy Olımpıada oıyndary ótedi.
