Rıo-de-Janeırodaǵy karnaval 8 mln adamdy jınap, ekonomıkalyq rekord ornatýy múmkin
ASTANA. KAZINFORM — Bıyl Rıo-de-Janeıroda ótetin karnavalǵa 460 top qatysady, olar bir aıdan astam ýaqyt boıy óner kórsetedi. Bul týraly AZERTADJ habarlady.
Agenttik SAPO ınternet-portalyna silteme jasap habarlaýynsha, resmı derekterge sáıkes, Brazılııanyń eń áıgili festıvali sanalatyn Rıo-de-Janeıro karnavalyna shamamen 8 mıllıon adam — qala turǵyndary men týrıster jınalady dep kútilip otyr. Bul qala ekonomıkasyna aıtarlyqtaı paıda ákelmek.
— Ótken jyly karnaval Rıo ekonomıkasyna 5,7 mlrd real (shamamen 919 mln eýro) kiris ákeldi. Al 2026 jyly bul kórsetkish odan da joǵary bolady dep kútiledi, — dedi Riotur týrıstik kompanııasynyń prezıdenti Bernardo Felloýz qala ákimdiginde ótken baspasóz máslıhatynda.
Belgili bolǵandaı, tek kóshedegi karnavaldyq sherýlerdiń ózi shamamen 6 mıllıon adamdy tartpaq. Olar bir aıdan astam ýaqyt boıy mýzyka, bı men merekelik kóńil kúıge bólenip, qala kóshelerinde bolady.
Kóshe festıvaline qatysatyn 460 top 18 qańtar men 22 aqpan aralyǵynda Rıonyń kvartaldary men basty kóshelerin dýmanǵa bóleıdi.
2026 jylǵa jergilikti bılikke toptardan 803 ótinim túsken, bul ótken jylmen salystyrǵanda 118-ge kóp. Alaıda, sherýlerge 35 jańa topty qosýǵa múmkindik bolǵanymen, logıstıkalyq sebepterge baılanysty basymdyq dástúrli toptarǵa berilgen kórinedi.
Eń kóp qoıylym men sherýler Rıo qalasynyń ortalyǵynda ótedi. Odan keıin týrıster kóp shoǵyrlanatyn, álemge áıgili Kopakabana men Ipanema aýdandaryn qamtıtyn aımaqtarda uıymdastyrylady.
Baǵdarlama ártúrli aýdıtorııaǵa arnalǵan: balalar men otbasylarǵa arnalǵan sharalardan bastap, Cordão da Bola Preta sııaqty 1 mıllıonnan astam adamdy jınaıtyn dástúrli merekelerge, sondaı-aq ánshi Anıtta sekildi tanymal ónerpazdar uıymdastyratyn ataqty «megablokolarǵa» (iri kóshe keshteri) deıin bar.
Qalalyq keńestiń málimetinshe, Rıoǵa keletin qalǵan 2 mıllıon adam 13–22 aqpan aralyǵynda ótetin karnaval aptasynda Sambadromdaǵy sherýlerdi tamashalaý úshin jınalady.
Osydan buryn habarlanǵandaı, koronavırýs pandemııasy kezinde Rıo-de-Janeıro bıligi jyl saıyn ótetin áıgili karnavaldan bas tartty.