Rıo-de-Janeıroda óner ujymdary narazylyq aktsııasyn ótkizdi
ASTANA. QazAqparat - Brazılııanyń Rıo-de-Janeıro qalasynda memlekettik shyǵyndardy qysqartýǵa qarsy óner ujymdary narazylyq aktsııasyn ótkizdi, dep jazady «Habar 24».
Bir qyzyǵy, olar úkimettiń ustanǵan saıasatyna kóńili tolmaı, kóshe kezip sherýletken joq. Kerisinshe, bılik nazaryn ózine aýdarý úshin ashyq aspan astynda kópshilikke kontserttik baǵdarlama kórsetti.
Narazylyq aktsııasy Brazılııada alǵashqylardyń biri bolyp ashylǵan qalalyq teatr aldynda ótti. Ónerpazdardyń aıtýynsha, olar birneshe aı jalaqy almaǵan. Óıtkeni ekonomıkalyq daǵdarys mádenıet salasyna qatty áser etip, teatrlardy qarjylandyrý aıtarlyqtaı qysqarǵan. Al amaly taýsylǵan qyzmetkerler aqysyz jumys istep júr. Mádenıet salasy alǵash ret osyndaı pushaıman kúıge túsip tur.
