Rıo -de Janeıroda matematıka páninen halyqaralyq olımpıada ashyldy
ASTANA. QazAqparat - Dúısenbi kúni Rıo-de-Janeıro qalasynda matematıka páni boıynsha halyqaralyq olımpıada ashyldy. Shara uıymdastyrýshylarynyń málimetinshe, bıylǵy jyly olımpıadaǵa qatysqan memleketter sany rekordtyq kórsetkishke jetken.
«Búgin biz 112 elden kelgen jas matematıkterdi qarsy aldyq. Bul matematıka páninen iri ári úlken kólemdegi halyqaralyq olımpıadanyń ótetindigin bildiredi. Biz buny maqtan tutamyz», - dedi ashylý saltanatynda sóz alǵan Brazılııa taza jáne qoldanbaly matematıka ınstıtýtynyń prezıdenti ári olımpıadanyń uıymdastyrý komıtetiniń ókili Marselý Vıana.
Matematıka boıynsha alǵashqy halyqaralyq olımpıada 1959 jyly Rýmynııada ótip, oǵan jeti memleketten kelgen orta mektep oqýshylary qatysqan. Sodan beri bul shara 1980 jyldy qospaǵanda, jyl saıyn dástúrli túrde uıymdastyrylyp keledi. Bıylǵy olımpıada 58-inshi jáne alǵash ret Brazılııa aýmaǵynda ótkizilip otyr.
