Rıo-de-Janeıroda belgili brazılııalyq fýtbol jattyqtyrýshysy Vanderleı Lýshembýrgo tonaldy
ASTANA. QazAqparat - Ispandyq «Real» fýtbol klýbynyń jáne Brazılııa ulttyq quramasynyń burynǵy jattyqtyrýshysy Vanderleı Lýshembýrgo Rıo-de-Janeıro qalasynda qarýly tonaýdyń qurbany boldy.
Bul týraly jergilikti BAQ habarlady.
Oqıǵa Lýshembýrgo baǵdarshamnyń qyzyl jaryǵyna toqtaǵan kezde oryn alǵan. Tonaýshy mototsıklmen kelip, jattyqtyrýshyny qarýmen qorqyta otyryp, saǵatyn tartyp alǵan. «Negizi men brondalǵan kólikpen júretinmin. Biraq osy joly jaı mashınamen kele jatqan edim. Qylmysker tapanshasyn meniń betime taqap, óltirgisi kelmeıtinin, biraq ómir súrýge aqsha tabýǵa májbúr ekenin aıtty», - deıdi ol.
Aıta keteıik, qazir 62 jastaǵy maman «Flamengo» klýbyn basqarady.
Lýshembýrgo brazılııalyq fýtbol tarıhynda ózindik rekord ornatqan adam. Ol basqarǵan «Krýzeıro» klýby bir maýsymda Brazılııa chempıonatyn, el Kýbogyn jáne shtat chempıonatyn utyp aldy. Sondaı-aq tórt klýbty bes ret Brazılııa chempıony atandyrǵan. Bıylǵy shildede ol óz mansabynda tórtinshi ret «Flamengonyń» bas bapkeri atandy. Al 2004- 2005 jyldarda madrıdtik «Realdy», 1998-2000 jyldarda Brazılııa quramasyn jattyqtyrdy.
