Rıngte tek bapkerdiń daýysyn ǵana estımiz - boksshy Ǵ. Jaılaýov
ASTANA. 19 shilde. QazAqparat - London Olımpıadasyna baratyn toǵyz boksshymyz Astanadaǵy oqý-jattyǵýlaryn aıaqtap jatyr. 21 shilde kúni olar Tumandy Albıonǵa ushyp ketedi. Sol jerde klımatqa beıimdelip, taǵy bir aptadaı jattyǵatyn bolady. Osy sapardyń aldynda Qazaqstannyń úsh dúrkin chempıony, Azııa chempıonatynyń júldegeri, bıyl Ázirbaıjannyń Baký qalasynda ótken Álem chempıonatynda qola medalǵa ıe bolyp, London Olımpıadasyna joldama utyp alǵan boksshy Ǵanı Jaılaýov «QazAqparat» tilshisine suhbat berdi.
- Ǵanı, Olımpıada aldyndaǵy daıyndyq qalaı ótip jatyr?
- Daıyndyǵymyz jaqsy ótip jatyr - birqalypty, bapkerler qatty salmaq túsirip jatqan joq. Buǵan deıin jattyǵýlarymyz Almatyda ótti. Onda taý-taspen júgirip daıyndaldyq. Mine, Astanadaǵy oqý-jattyǵýlarymyz da aıaqtalyp keledi. Jalpy, bári durys, úıge, otbasyǵa degen saǵynysh sezimimiz bolmasa. Endi, alda - London Olımpıadasy. Negizgi maqsatymyz - Anglııadan qur qol qaıtpaı, halyqtyń senimin barynsha aqtaý.
- Londonǵa attanǵaly jatyrsyńdar. Ol jaqtyń klımaty daıyndyqqa keri áser etpeı me?
- Londonnyń aýa-raıy ylǵaldy. Biraq biz bıylǵy kóktemde ol jaqqa baryp, ortaq oqý-jattyǵýlardy ótkizgenbiz. Sol kezde klımattyń keri áseri sezilgen joq. Londonǵa bir apta buryn bara jatyrmyz ǵoı. Ol ýaqyttyń ishinde Tumandy Albıonnyń aýa-raıyna ábden úırenip alatyn múmkindik bar.
- Osy ýaqytqa deıin qarsylastaryńdy da zerttep úlgergen shyǵarsyń?
- Negizi, biz bapker ekeýimiz Ázirbaıjannyń Baký qalasynda ótken Álem chempıonatyna deıin, ol ótkennen keıin de, qarsylas sportshylardy jan-jaqty zerttep kelemiz. Qazirgi kezde 60 keli salmaq dárejesinde myqty sportshylar óte kóp. Olardyń ishinde ýkraındyq Vasılıı Lomachenko, ıtalıandyq Domınıko Valentıno, sondaı-aq Kýba men Ózbekstannyń kásibı qolǵap sheberleri bar. Jalpy, biz on shaqty myqty qarsylasty tizip shyqtyq. Onyń 70 paıyzymen sharshy alańǵa shyqqanmyn, qalǵanyn syrttan zerttep kelemin. Qazirgi kezde bapker ekeýimiz jatsaq ta, tursaq ta, qarsylastarymyzdy oılamyz. «Olardan aılamyzdy qalaı asyryp ketemiz?», - dep kúnde daıyndyqpen bolamyz. Beınetaspalardy qaı-qaıta kórip, árbir qarsylasqa qarsy jeke taktıkany ushtap otyramyz.
- Ǵanı, ishki daıyndyq qalaı bolyp jatyr?
- Bapkerim - Nurlan Aqúrpekov meni únemi ishteı qaırap otyrady. «Seniń qarsylasyń da óziń sııaqty. Eki qoly men eki aıaǵy bar», - deıdi ol. Sosyn Nurlan aǵanyń aıtýynsha, tórt jylda bir-aq ret bolatyn London Olımpıadasy sııaqty dúbirli dodalarda ishteı qatty umtylý qajet. Ondaıda boksshylardyń kóbisi top jaryp, jeńimpaz atanyp jatady. Men de ishteı tek jeńisti ǵana tilep júrmin.
- London Olımpıadasynda seniń alǵashqy jekpe-jegiń qashan ótedi?
- Bilýimshe, 60 keli salmaq dárejesindegi boksshylar 29 shilde kúni shyǵady. Biraq men ol kúni shyǵamyn ba, joq pa, ol jaǵyn bilmedim. Sebebi ony da jerebe tastaý rásimi anyqtaıdy.
- Óziń rıngke shyqqan kezde neni oılaısyń?
- Eń birinshi, qarsylasymdy oılaımyn. Odan aılamdy qalaı asyryp ketsem eken, dep bar kúsh-jigerimdi salýǵa tyrysamyn.
- Boksshylarda rıngke shyǵardyń aldynda bir yrymdar bolýshy edi ǵoı?
- Joq, mende ondaı yrymdar joq. Rıngke shyqqanda kez kelgen boksshyda qobaljý degen bolady ǵoı. Men bir Allaǵa ǵana syıynyp shyǵamyn.
- Ǵanı, sóz basynda otbasyńdy saǵynǵanyńdy aıttyń. Ol seniń daıyndyǵyńa qalaısha áser etedi. Bálkim, olardyń seniń janyńda bolǵany durys shyǵar?
- Londonǵa keterdiń aldynda jubaıym men qyzymdy Astanaǵa aldyrtýǵa bolady dep aıtqan edi. Biraq ol bolmasa, kete beremiz ǵoı. Biz ondaıǵa úırenip qalǵanbyz (kúldi). Bıyl demeýshiler keıbir sportshylardyń ata-anasyn Londonǵa alyp barady dep estigenmin. Ol da jaqsy ǵoı. Óz basym sharshy alańǵa shyqqan kezde, zalda jaqyn adamdardyń bolǵanyn qalaımyn. Olar da sen úshin jankúıer bolyp, aıǵaılap, rýh beredi. Degenmen, biz bapkerdiń daýysyn ábden jattap alǵanbyz ǵoı, rıngte barlyq aıqaı-shýdyń arasynan tek bapkerdiń daýysyn ǵana estımiz.
