Rıngke oralar sátti asyǵa kúttim: Jaraqatynan aıyqqan Qanat Islam
NUR-SULTAN. QazAqparat - Eshqashan jeńilip kórmegen boksshy Qanat Islam aıaǵynan alǵan jaraqattan keıin rıngke oralýǵa ázir ekenin aıtty. Sportshy sondaı-aq, jankúıerlerine «tańqaldyrarlyq shoý» kórsetýge de ýáde etti, dep habarlaıdy Sputnik Kazahstan.
«Mende biraz úzilis boldy, qaıtyp oralý ońaı emes. Ómirde azdaǵan qıyndyqtar da bolyp turady, biraq onyń bári ýaqytsha. Men rıngke oralýyma bar yntammen daıyndaldym, osy sátti kúttim. Kútken ýaqytym jetken sııaqty. Jankúıerlerim úshin úzdik oıyn kórsetemin», - dedi Qanat Islam 27 maýsym kúni Almatyda ótken jattyǵýdan keıin.
Boksshy sondaı-aq, aldaǵy jekpe-jekte qarsylasy domınıkalyq Hýlıo de Hesýs bolatynyn málim etti.
Aıta keteıik, Islam men de Hesýs arasyndaǵy jekpe-jek 5 shilde kúni Almaty qalasyndaǵy Balýan Sholaq atyndaǵy sport saraıynda ótedi.
Bul aıqasta boksshylar WBO Inter-Continental belbeýi úshin talasady.
Qanat Islam sońǵy ret rıngke ótken jyldyń qyrkúıek aıynda shyqty. Ol joly kanadalyq Brendon Kýkty tehnıkalyq nokaýtpen jeńgen bolatyn.
