Rınat Zaıytov memlekettik organdardyń jumysy týraly: zań buzý azaıatyn emes
ASTANA. KAZINFORM – Májilis depýtaty Rınat Zaıytov memlekettik organdardyń jumysyn synǵa aldy. Onyń paıymdaýynsha, zańdardyń oryndalýynda memlekettik organdar salǵyrttyq tanytyp otyr.
«Prezıdent Qasym-Jomart Toqaev jyl saıynǵy halyqqa Joldaýynda astyn syzyp turyp aıtatyn tapsyrmalarynyń biregeıi ol – «ashyqtyq pen ádilettilik». Biraq, sol maqsatty iske asyrýǵa Úkimet músheleri men ózge memlekettik organdary mardymsyz jumys jasap otyrǵanyna kún saıyn kózimiz jetedi. Parlament Májilisi halyqpen tikeleı baılanysta bolǵandyqtan juma saıyn jurttyń aryzyn tyńdap, ótinishterin qabyldaıdy. Solardyń basym kópshiligi belgili bir vedomstvo basshysynyń qabyldaýyna kirý. Sebebi óńirlerdegi jáne alyp megapolısterdegi sholaq belsendi, ortasha deńgeıdegi qyzmetkerlerdiń «ózim bilemdikke» salyp zań buzýy azaıatyn emes. Oǵan mysalymyz da, dálelimiz de jetip artylady», - dedi Rınat Zaıytov Bas prokýror Berik Asylovtyń atyna depýtattyq saýal joldaı otyryp.
Halyq qalaýlysynyń aıtýynsha, Bas prokýratýra, Joǵarǵy Sot pen mınıstrlerdiń esigi halyq kelgende bir ashylǵan emes. Bul qalaı? «Estýshi Úkimet» qaǵıdatyn ustanýdy tapsyrǵan Memleket basshysynyń sózi eskerilýge de tatymaǵany ma?» deıdi ol.
Sonymen qatar depýtat QR ÁRPK 90-babynyń 1-tarmaǵyna sáıkes memlekettik organdardyń basshylary jáne olardyń orynbasarlary tıisti memlekettik organnyń basshysy bekitetin qabyldaý kestesine sáıkes aıyna keminde bir ret azamattardy jáne zańdy tulǵalardyń ókilderin, onyń ishinde osy organdardyń qyzmetkerlerin jeke qabyldaýdy júrgizýge mindetti ekenin eske saldy.
«Ókinishtisi sol. Bul zańdardy oryndaýda memlekettik organdar salǵyrttyq tanytyp otyr. Sonda, jalǵyz balasy jalamen sottalǵan ana, jarynyń jumbaq qazasy, jyldap tergelmegen áıel, áskerdegi uly múgedek bolyp qalǵan áke, kásibinen zańsyz aıyrylǵan kásipker, jalǵyz baspanasy alaıaqtarǵa qoldy bolǵan otbasy, sot sheshimin oryndata almaı júrgen jábirlenýshiler taǵy sol sııaqty myńdaǵan qorǵansyz halyq ádildikti qaıdan tappaq?», - deıdi R.Zaıytov.
Osylaısha májilismen Bas prokýrordan laýazymdy tulǵalar men halyqtyń arasynda kedergisiz baılanys ornatý joldaryn qarastyrýdy jáne azamattardyń aryzdary syrǵytpa jaýap deńgeıinde qalmaýyn qadaǵalaý júıesimen qamtamasyz etýdi talap etti.
